टिप्पर चालकाने चौघांना चिरडले, मुलाचा मृत्यू; आजोबासह तिघे गंभीर जखमी

या अपघातांमुळे कापसी, पारडी परिसर तसेच रिंग रोडवर प्रचंड संतापाचे वातावरण निर्माण झाले होते.

नागपूर : दारुड्या टिप्पर चालकाने पारडी-कापसी मार्गावर रविवारी दुपारी हैदोस घालून चाैघांना चिरडले. यात एका १३ वर्षीय मुलाचा करुण अंत झाला तर त्याच्या आजोबासह तिघे गंभीर जखमी झाले. शहरात राष्ट्रपती महोदयांसह अनेक व्हीव्हीआयपी आले असताना घडलेल्या या अपघातामुळे शहरात मोठी खळबळ निर्माण झाली होती.

मृत बालकाचे नाव रूपेश बृजेश साहू (वय १३) असून त्याचे आजोबा किसनलाल शिवचरण साहू (वय ५७, रा. झेंडा चाैक, विजयनगर, कळमना) तसेच सुरेश तितरमारे आणि किरण नारायणराव कातोरे (वय ३८, रा. चांदूर रेल्वे) अशी जखमींची नावे आहेत. या अपघाताला कारणीभूत असलेल्या आरोपी टिप्पर चालकाचे नाव भरतलाल पतीलाल इरपाचे (वय ३९, रा. डोंगरगाव, बुटीबोरी) असून, पोलिसांनी त्याला अटक केली आहे.

आरोपी इरपाचेने मोठ्या प्रमाणात दारू पिऊन डोंगरगाव येथून टिप्पर क्रमांक एमएच ४० एके ६९४५ मध्ये गिट्टी आणि बोल्डर भरून स्मार्ट सिटी प्रकल्पात आणली. ती खाली केल्यानंतर इरपाचे दारूच्या नशेत टिप्पर घेऊन वेगात कापसी पुलाजवळून निघाला. दुचाकीवर जात असलेल्या किसनलाल साहू आणि त्यांचा नातू रूपेश या दोघांना टिप्परने चिरडले. रूपेशचा जागीच मृत्यू झाला तर किसनलाल गंभीर जखमी झाले. या अपघातानंतर आरोपी इरपाचेने टिप्पर थांबवण्याऐवजी पळून जाण्यासाठी वेगात दामटला. काही अंतरावरच त्याने सुरेश शामराव तितरमारे आणि किरण नारायण कातोरे या दोघांना उडवले. त्यानंतरही आरोपी थांबायचे नाव घेत नव्हता.

अपघातामुळे संतप्त झालेल्या जमावातील काही जण पाठलाग करीत असल्याचे लक्षात आल्याने तो बेभान झाला होता. त्याने तेलंगणाला जाणाऱ्या एपी २३- यू १५१० क्रमांकाच्या टँकरला त्याने जोरदार धडक मारली. दरम्यान, या अपघाताच्या मालिकेची माहिती कळताच कंट्रोल रूमच्या पोलिसांनी त्या भागातील पारडी, वाठोडा, कळमना आणि हुडकेश्वर पोलिसांना तातडीने टिप्परचालकाला रोखण्याचे आदेश दिले. त्यामुळे हादरलेल्या सर्व पोलीस ठाण्यांतील गस्तीवरील अधिकारी, कर्मचाऱ्यांनी तिकडे धाव घेतली. पारडी पोलिसांनी काही अंतरावर टिप्परचालकाला अडविले. तो दारूच्या नशेत टुन्न होता. त्याला ठाण्यात आणून त्याच्याविरुद्ध पोलिसांनी सदोष मनुष्य वधाच्या आरोपाखाली कलम ३०४ अन्वये गुन्हा दाखल केला. दरम्यान, या अपघातांमुळे कापसी, पारडी परिसर तसेच रिंग रोडवर प्रचंड संतापाचे वातावरण निर्माण झाले होते.

आत्याकडे निघाला होता रूपेश

रूपेशची आत्या (किसनलाल यांची मुलगी) त्याच मार्गावर वडोदा येथे राहते. तिच्याकडे असलेल्या कार्यक्रमासाठी रूपेश आजोबासोबत दुचाकीने जात होता. मात्र, इरपाचे चालवत असलेल्या टिप्परच्या रूपातील काळाने त्याच्यावर मध्येच झडप घातली.

वाढते अपघात, समाजमन चिंतित

शहरात जीवघेण्या अपघातांची संख्या सारखी वाढत आहे. गेल्या वर्षीच्या तुलनेत अपघात वाढत असल्याने पोलीस आयुक्त अमितेशकुमार यांनी तीन दिवसांपूर्वीच पत्रकारांशी बोलताना चिंता व्यक्त करून प्रभावी उपाययोजना करण्याचे संकेत दिले होते. त्याच्या काही तासांनंतरच शुक्रवारी रात्री उमरेड मार्गावर भीषण अपघात होऊन सात जणांचा मृत्यू झाला. आजही अपघाताची मालिका झाली. बुधवारी आणि शुक्रवारीसुद्धा विविध भागात अपघातांनी बळी घेतले. त्यामुळे समाजमन चिंतित झाले आहे.

हिंगणा, प्रतापनगरातही दोघांचा अपघाती मृत्यू

हिंगणा पोलीस ठाण्याच्या हद्दीत शुक्रवारी दुपारी ३ च्या सुमारास अपघात झाला. त्यात बुटीबोरीतील अक्षय मुनेश्वर डोंगरे (वय २०) याचा करुण अंत झाला. तर दुचाकीवर बसलेला प्रकाश प्रभाकर बारी (वय २८, रा. सुकडी, हिंगणा) जबर जखमी झाला. त्याचप्रमाणे धंतोलीतील विश्रामनगरात राहणारे सुदर्शन गिरिधरशरण तिवारी (वय ३६) यांना नरेंद्रनगर ते छत्रपती चाैकादरम्यान भरधाव वाहनचालकाने धडक मारली. त्यामुळे तिवारी यांचा करुण अंत झाला. ४ मेच्या मध्यरात्री हा अपघात झाला होता.