वासनेची शिकार ठरली बालिका व अल्पवयीन मुलगी

Nagpur News नागपुरात एका बालिकेसह दोन अल्पवयीन मुलींना वासनेची शिकार केल्याच्या घटना घडल्या आहेत.

ठळक मुद्देदोन दिवसांत चार घटना

नागपूर : बालिकेसह दोन अल्पवयीन मुलींना वासनेची शिकार केल्याच्या घटना घडल्या आहेत. दोन्ही घटनांमधील पीडिता आई-वडिलांच्या नात्यात दुरावा असल्यामुळे आजी-आजोबांसोबत राहतात. दोन दिवसांत बलात्कार, तसेच छेडखानीच्या चार घटना घडल्या आहेत.

पहिल्या घटनेतील पीडिता सहा वर्षांची बालिका आपल्या आईसोबत आजीच्या घरी राहते. घरातील कूलर खराब असल्यामुळे तो दुरुस्त करण्यासाठी तिच्या आजीने वस्तीतील ६० वर्षांच्या देवदास वाघमारेला घरी बोलावले होते. मंगळवारी दुपारी देवदास बालिकेच्या आजीच्या घरी आला. त्यावेळी बालिका आणि तिचा मावसभाऊ हेच घरी होते. देवदास आल्यानंतर तिचा मावसभाऊ खेळण्यासाठी बाहेर गेला. बालिका घरी एकटीच होती. ते पाहून देवदासने कूलर दुरुस्त करण्याच्या बहाण्याने बालिकेशी जबरदस्ती केली. बालिकेने आरडाओरड केल्यामुळे तिचा मावसभाऊ घराकडे येत होता, ते पाहून देवदास पळून गेला. बालिकेने आपल्या आईला आपबिती सांगितली. तिच्या तक्रारीवरून अजनी पोलिसांनी बलात्कार, तसेच पोक्सोचा गुन्हा दाखल करून देवदासला अटक केली.

दुसरी घटना हुडकेश्वरमध्ये घडली आहे. १७ वर्षांची अल्पवयीन मुलगी आईवडील वेगळे झाल्यामुळे आजी-आजोबांसोबत राहते. सोमवारी रात्री तिला स्वयंपाक करण्यासाठी वेळ लागला. त्यामुळे कुटुंबीयांनी तिला रागावले. संतप्त होऊन ती घरातून निघून गेली. ती रात्री १.४५ वाजता परिसरात भटकत होती. त्यावेळी २० वर्षांच्या एका युवकाने तिला धक्का दिला. तिने हिमतीने त्याला फटकारले. दरम्यान, युवकाने तिला पकडून तिच्याशी जबरदस्ती करीत होता. त्याचा मुकाबला करून ती रेल्वे स्थानकावर पोहोचली, तेथे पोलिसांची नजर तिच्यावर गेली. पोलिसांनी चौकशी केली असता, तिने घटनेची माहिती दिली. रेल्वे पोलिसांनी हुडकेश्वर ठाण्यात याची माहिती दिली. दरम्यान, ती गायब असल्यामुळे तिचे कुटुंबीय हुडकेश्वर ठाण्यात पोहोचले होते. तिच्या तक्रारीवरून हुडकेश्वर पोलिसांनी छेडखानी, तसेच पोक्सोनुसार गुन्हा दाखल केला आहे.

...........