सरकारच्या सातव्या वर्षपूर्तीनिमित्त भाजपकडून उत्सव नाही

लोकमत न्यूज नेटवर्क

नागपूर : पंतप्रधान नरेंद्र मोदी यांच्या नेतृत्वाखालील केंद्र सरकारला ३० मे रोजी सात वर्षे पूर्ण होत आहेत. कोरोनाची स्थिती लक्षात घेता यादिवशी भाजपकडून कुठलाही जल्लोष होणार नसून कार्यकर्त्यांनी तळागाळात जाऊन सेवाकार्य करावे, असे शहराध्यक्ष आमदार प्रवीण दटके यांनी सांगितले.

शहरात ३० मे रोजी भाजपाचे कार्यकर्ते शेवटच्या माणसाला प्रत्यक्ष भेट देतील. आशा सेविका आणि कोरोनाच्या साथीचा सामना करणाऱ्या कोरोना योद्ध्यांचा पक्षातर्फे सत्कार करण्यात येईल. स्थानीय आमदार, नगरसेवक, मंडल अध्यक्ष, सर्व पदाधिकारी, भाजपचे कार्यकर्ते कोरोनासंबंधी सेवाकार्य करतील. तसेच विविध ठिकाणी रक्तदान शिबिरांचे आयोजन होईल, असे दटके यांनी सांगितले. काही दिवसांपूर्वी पक्षाची राज्यस्तरीय ऑनलाइन बैठक झाली. त्या बैठकीत विधानसभेचे विरोधी पक्षनेते देवेंद्र फडणवीस व प्रदेशाध्यक्ष चंद्रकांत पाटील यांनी सेवाकार्य करण्याबाबत सूचना दिल्या होत्या, असेदेखील त्यांनी स्पष्ट केले.