सिताबर्डीत हजारोंची गर्दी अन् मुख्य मार्गावरील दुकानाला लागली आग उडाली एकच पळापळ

सुदैवाने कुठलीही जीवीतहानी झालेली नाही. अग्निशमन दलाच्या कर्मचाऱ्यांकडून आग विझविण्याचे प्रयत्न सुरू आहेत.

नागपूर : दिवाळीच्या अगोदरचा रविवार असल्याने नागपुरातील मध्यवर्ती बाजार असलेल्या सिताबर्डीत खरेदीसाठी नागरिकांची तोबा गर्दी उडाली असताना एका दुकानाला भीषण आग लागली. यामुळे मोठ्या प्रमाणावर पळापळ झाली. सुदैवाने कुठलीही जीवीतहानी झालेली नाही. अग्निशमन दलाच्या कर्मचाऱ्यांकडून आग विझविण्याचे प्रयत्न सुरू आहेत.

सिताबर्डीत रविवारी दुपारी हजारो लोक खरेदीसाठी पोहोचले होते. रस्त्यावर पाय ठेवायला जागा नसताना अचानक एका बहुमजली इमारतीमधील एका दुकानाला आग लागली. ती आग इतर दुकानांपर्यंत पोहोचली व आग तसेच धुराचे लोळ बाहेर आले. ते पाहून नागरिकांची पळापळ झाली. अग्निशमन दलाचे कर्मचारी काही वेळातच घटनास्थळी पोहोचले व आग विझविण्याचे प्रयत्न सुरू आहेत. हजारोंची गर्दी असताना सुदैवाने कुठलीही दुर्दैवी घटना घडली नाही.