भरधाव वाहनाच्या धडकेत दुचाकी चालकाचा मृत्यू

नागपूर : भरधाव वाहन चालकाने धडक दिल्यामुळे मिथुन सुभाष जाधव (वय २८, रा. वानाडोंगरी) यांचा करुण अंत झाला.

रविवारी रात्री ११ च्या सुमारास मिथुन सीताबर्डी परिसरातून दुचाकीने आपल्या घरी जात होते. हिंगणा मार्गावरील बालाजीनगर बसथांबासमोर त्यांना एका वाहनचालकाने जोरदार धडक दिली. त्यामुळे ते गंभीर जखमी झाले. त्यांना उपचाराकरिता लता मंगेशकर हॉस्पिटल येथे नेले असता डॉक्टरांनी तपासून मृत घोषित केले. सूरज सुभाष जाधव यांनी दिलेल्या माहितीवरून एमआयडीसी पोलिसांनी अपघाताची नोंद केली. आरोपी वाहनचालकाचा शोध घेतला जात आहे.

---

जुन्या वादातून घरावर दगडफेक

नागपूर : एकाच वस्तीत राहणाऱ्या दोन कुटुंबांमध्ये सुरू असलेल्या वादाचे पर्यवसान हल्ल्यात झाले. पाच आरोपींनी अक्षय अशोक खोब्रागडे यांच्या घरावर हल्ला केला. रविवारी रात्री ११.३० च्या सुमारास ही घटना घडली.

खोब्रागडे यांनी अमन कारेमोरे याला खोट्या गुन्ह्यात फसविल्याचा संशय होता. त्यावरून आरोपी देवेंद्र कारेमोरे, मनीषा कारेमोरे, बाल्या कारेमोरे, भारती कारेमोरे आणि आयुष कारेमोरे या सर्वांनी रविवारी रात्री खोब्रागडे यांच्या घरावर दगडफेक केली. खोब्रागडे यांनी दिलेल्या तक्रारीवरून नंदनवन पोलिसांनी विविध कलमांनुसार गुन्हा दाखल केला. आरोपींची चौकशी सुरू आहे.

----