अनियंत्रित ट्रक ट्रेलरवर आदळला

बुटीबाेरी : चालकाचा ताबा सुटल्याने अनियंत्रित झालेला ट्रक राेडलगत उभ्या असलेल्या ट्रेलरवर मागून आदळला. यात गंभीर जखमी झालेल्या ट्रकचालकाचा घटनास्थळीच मृत्यू झाला. ही घटना बुटीबाेरी (ता. नागपूर ग्रामीण) पाेलीस ठाण्याच्या हद्दीतील माेहगाव शिवारात रविवारी (दि. १५) मध्यरात्री घडली.

शाहरुख माेहम्मद जागीर मन्सुरी (२३, रा. हलगलपूर, जिल्हा कानपूर, उत्तर प्रदेश) असे मृत ट्रकचालकाचे नाव आहे. शाहरुख यूपी-०९/जीएच-७५७२ क्रमांकाच्या ट्रकने जात हाेता. त्याच्यासाेबत आणखी एक चालक हाेता. माेहगाव शिवारात त्याचा ट्रकवरील ताबा सुटला आणि वेगात असलेला ट्रक राेडलगत उभ्या असलेल्या एमएच-३१/एम-६१११ क्रमांकाच्या ट्रेलरवर मागून आदळला. यात गंभीर दुखापत झाल्याने शाहरुखचा घटनास्थळीच मृत्यू झाला. माहिती मिळताच पाेलिसांनी घटनास्थळ गाठून मृतदेह उत्तरीय तपासणीसाठी पाठविला. याप्रकरणी बुटीबाेरी पाेलिसांनी भादंवि २७९, ३०४ (अ) अन्वये गुन्हा दाखल केला असून, या घटनेचा तपास सहायक फाैजदार संजय खंडारे करीत आहेत.