हसनबाग रोडवरील आठवडी बाजार हटविला

अवैध शेड तोडले, अतिक्रमण करणाऱ्यांचे साहित्य जप्त

लोकमत न्यूज नेटवर्क

नागपूर : महापालिकेच्या अतिक्रमणविरोधी पथकाने सोमवारी नेहरूनगर झोन क्षेत्रातील हसनबाग रोडवर भरणारा आठवडी बाजार हटविला.

हसनबाग ते रमना मारोती नगर रोडवर तसेच फूटपावरील दुकानामुळे रहदारीला अडथळा होत असल्याच्या तक्रारी प्राप्त झाल्या होत्या. त्यानुसार पथकाने कारवाई केली. सायंकाळपर्यंत ही कारवाई चालली. ज्योती स्कूलजवळील दोन अवैध शेड जेसीबीच्या साह्याने तोडण्यात आले.

दुसऱ्या पथकाने आशीनगर झोन क्षेत्रातील इंदोरा चौक येथील फूटपाथवरील हात ठेले जप्त केले. कमाल चौक रोड व कमाल चौक बाजार येथील पार्किंगच्या जागेवरील अतिक्रमण हटवून एक ट्रक साहित्य जप्त करण्यात आले. तिसऱ्या पथकाने गांधीबाग झोन क्षेत्रातील बडकस चौक रोडवरील ३२ अतिक्रमण हटविले. त्यानंतर सतरंजीपुरा झोन कार्यालय ते इतवारी, दही बाजारपर्यंतच्या मार्गावरील अतिक्रमण हटविण्यात आले.

0000000