अनोळखी व्यक्तीसोबत दारू प्यायला गेला अन दीड तोळ्याची झाली चेनस्नॅचिंग

अनोळखी व्यक्तीने केलेली दारू पिण्याची ऑफर स्वीकारण एका कॅबचालकाला चांगलेच महागात पडले.

नागपूर : अनोळखी व्यक्तीने केलेली दारू पिण्याची ऑफर स्वीकारण एका कॅबचालकाला चांगलेच महागात पडले. दारू पिऊन बाहेर आल्यावर अनोळखी व्यक्तीने चालकाच्या गळ्यातील दीड तोळ्याची सोन्याची चेन खेचत पळ काढला. अजनी पोलीस ठाण्याच्या हद्दीत ही घटना घडली.

विशाल मेश्राम (३४, भगवाननगर) असे चालकाचे नाव आहे. विशाल रात्री अकरा वाजताच्या सुमारास मित्रासोबत एका पानठेल्यावर उभा होता. त्यावेळी तेथे दोन अनोळखी व्यक्ती आले व त्यांनी विशालला दारू पिशील का असे विचारले. फुकटात दारू भेटत असल्याने विशालने हो म्हटले व तो त्यांच्यासोबत मानेवाडा रोडवरील ब्रम्हा बारमध्ये गेला. त्याच्यासोबत आतमध्ये एकच व्यक्ती आला. दोघांनी अर्धा तास दारू पिली व त्याचे पैसे अनोळखी व्यक्तीनेच दिले. त्यानंतर ते पावणेबारा वाजताच्या सुमारास बाहेर आले असता अनोळखी व्यक्तीने विशालच्या गळ्यातील सोन्याच्या चेनला हिसका मारला व पळ काढला. विशालने त्याचा पाठलाग करण्याचा प्रयत्न केला.

मात्र अंधाराचा फायदा घेत अनोळखी व्यक्ती फरार झाला. विशालने अजनी पोलीस ठाण्यात तक्रार नोंदविली व पोलिसांनी गुन्हा दाखल केला. त्याने दिलेल्या वर्णनावरून पोलिसांनी खबऱ्यांच्या नेटवर्कला कामाला लावले व निशांत सुरेश माकडे (३३, न्यू कैलास नगर) याला ताब्यात घेतले. त्याला विचारणा केली असता त्याने गुन्ह्याची कबुली दिली. पोलिसांनी त्याला अटक केली.