हृदयरोग असो वा अ‍ॅलर्जी, कोरोना लस घ्यायलाच हवी

नागपूर : कोरोनाचा सर्वाधिक धोका ज्येष्ठ नागरिकांना, ज्यांना रक्तदाब, मधुमेह, मूत्रपिंड आणि हृदय रोग आहेत त्यांना आहे. म्हणूनच सरकारने तिसऱ्या टप्प्यात याच नागरिकांच्या लसीकरणास सुरुवात केली आहे. परंतु अनेक लाभार्थी गैरसमजुतीपोटी लस घेण्यास समोर येत नसल्याचे दिसून येत आहे. परंतु ही लस सर्वच दृष्टिकोनातून सुरक्षित असल्याने कोणतेही आजार असल्यास, अ‍ॅलर्जीसुद्धा असल्यास नि:संकोचपणे घ्यावी, असे आवाहन तज्ज्ञ डॉक्टरांनी केले आहे.

कोरोना प्रतिबंधक लसीकरणाला १६ जानेवारीपासून सुरुवात झाली. कोरोना आणीबाणीच्या काळात ज्यांनी रुग्णसेवा दिली त्या हेल्थ वर्करचे पहिल्या टप्प्यात लसीकरण सुरू झाले. दुसऱ्या टप्प्यात ‘फ्रंट लाईन वर्कर’ तर तिसऱ्या टप्प्यात ६० वर्षांवरील व ४५ वर्षांवरील गंभीर आजार असलेल्या लाभार्थ्यांचे लसीकरण सुरू आहे. सीरम इन्स्टिट्यूटची ‘कोविशिल्ड’ व भारत बायोटेकची ‘कोव्हॅक्सिन’ लस दिली जात आहे. ६० वर्षांवरील ज्येष्ठांचे रोज ५ ते ६ हजार तर ४५ वर्षांवरील गंभीर आजार असलेल्या एक ते दीड हजार लाभार्थ्यांचे लसीकरण होत आहे. ८ मार्चपर्यंत जवळपास ३५ हजार ज्येष्ठांचे तर गंभीर आजार असलेल्या १० हजार लाभार्थ्यांनी लस घेतली आहे. लसीकरणासाठी शहरात शासकीयसह खासगी रुग्णालयातील ५५ केंद्रांवर तर ग्रामीणमध्ये १५ केंद्रांवर लस दिली जात आहे. कोरोना प्रतिबंधक लस घेणे गरजेचे असले तरी, अनेकांच्या मनात याविषयी शंका आहेत. यासंदर्भात ‘लोकमत’ने डॉक्टरांशी चर्चा केली असता, ही लस सुरक्षित असून, त्यापासून कोणताही धोका किंवा दुष्परिणाम नसल्याचे त्यांनी सांगितले. रक्तदाब, मधुमेह, मूत्रपिंड आणि हृदय रोगच नव्हे तर ज्यांना अ‍ॅलर्जी असेल त्यांनीही लस घेण्याचे आवाहन केले आहे.

-मूत्रपिंड विकाराच्या आजाराच्या रुग्णांसाठी लस फायद्याची

मूत्रपिंड विकाराच्या रुग्णांमध्ये रोगप्रतिकारशक्ती कमी झालेली असते. अशावेळी कोरोनाचा संसर्ग होण्याचा धोका अधिक राहतो. संसर्ग झाल्यास रुग्णांमध्ये गुंतागुंत वाढून आजार गंभीर होण्याची शक्यता अधिक असते. ते टाळण्यासाठी प्रत्येकांनी कोरोनाची लस घेणे गरजेचे आहे.

- डॉ. संजय कोलते

मूत्रपिंड प्रत्यारोपण तज्ज्ञ

- ताप आला तरी घाबरू नये...

लसीकरणानंतर ताप येणे, लस दिलेल्या जागी खाज सुटणे, हात दुखणे, थकल्यासारखे वाटणे आदी त्रास होऊ शकतो. ही एक सामान्य प्रतिक्रिया आहे. त्यामुळे घाबरण्याचे कारण नाही. आजपर्यंत कोणताही गंभीर दुष्परिणाम झाल्याचे उदाहरण नाही. यामुळे ६० वर्षांवरील ज्येष्ठांनी व ४५ वर्षांवरील गंभीर आजार असलेल्यांनी लस घेणे गरजेचे आहे.

- डॉ. पिनाक दंदे, वरिष्ठ फिजिशियन

- लसीचे दुष्परिणाम नाही

हृदयरोग किंवा मधुमेह असणाऱ्या रुग्णांनी कोरोना प्रतिबंधक लस घेण्यास काहीही हरकत नाही. लसीचे कोणतेही दुष्परिणाम नाहीत. उलट लस न घेणे म्हणजे आपली रिस्क वाढवून घेण्यासारखेच आहे. त्यामुळे प्रत्येकाने ही लस घेतलीच पाहिजे.

- डॉ. आनंद संचेती, हृदयरोग तज्ज्ञ