बैलाच्या हल्ल्यात महिलेचा मृत्यू

पारशिवनी : चराई करून आलेली गुरे खुंट्याला बांधत असताना अचानक बैलाने महिलेवर हल्ला केला. बैलाने शिंगावर उचलून फेकल्याने महिलेच्या डाेक्याला गंभीर दुखापत झाली. दरम्यान, रुग्णालयात नेत असताना वाटेतच मृत्यू झाला. ही घटना पारशिवनी पाेलीस ठाण्याच्या हद्दीतील घुकसी येथे मंगळवारी (दि.११) घडली.

ममता नारायण नारनवरे (३०, रा. घुकसी, ता. पारशिवनी) असे मृत महिलेचे नाव आहे. मंगळवारी नेहमीप्रमाणे तिने आपली गुरेढाेरे चराईला नेली हाेती. चराई करून आल्यानंतर सायंकाळी सर्व गुरेढाेरे गाेठ्यात बांधत असताना अचानक एका बैलाने ममतावर हल्ला चढविला. तिला शिंगाने उचलून फेकले. यात तिच्या डाेक्याला गंभीररीत्या दुखापत झाली. लागलीच तिला रुग्णालयात नेण्यात आले. प्राथमिक उपचारानंतर ती घरी आली. यावेळी तिची प्रकृती स्थिर हाेती. दरम्यान, बुधवारी (दि.१२) जेवण केल्यानंतर तिचा त्रास वाढला. तिला रुग्णालयात नेत असताना वाटेतच तिचा मृत्यू झाला. स्थानिक स्मशानभूमीत अंत्यसंस्कार करण्यात आले. तिच्या मृत्यूमुळे गावात शाेककळा पसरली आहे. मृत महिलेच्या कुटुंबीयांना शासनाने आर्थिक मदत द्यावी, अशी ग्रामस्थांची मागणी आहे.