लोकमतच्या उपक्रमामुळे महिलांमधील आत्मविश्वास बळावला

लोकमतने महिलांना सन्मानित करण्याच्या उद्देशाने एका खास उपक्रमाला प्रारंभ केला आहे.

नागपूर : लोकमतने महिलांना सन्मानित करण्याच्या उद्देशाने एका खास उपक्रमाला प्रारंभ केला आहे. याअंतर्गत ‘तीचा गणपती’ हा उत्सव साजरा करण्यात येत आहे. लोकमत सखी मंचच्या संयोजनात आणि अष्टविनायक गणेशोत्सव मंडळाच्या सहकार्याने व्यंकटेशनगर, नंदनवन ब्लॉक, एच. घरकूल येथे हा गणेशोत्सव महिलांतर्फे जोशात आयोजित करण्यात आला. या उत्सवाच्या दहाव्या दिवशी शनिवारी प्रमुख अतिथी दक्षिण पूर्व मध्य रेल्वेच्या महिला संघटनेच्या अध्यक्ष तनुजा आलोक कंसल यांच्या हस्ते आराध्य गणेशाची आरती करण्यात आली.
महिलांमध्ये प्रचंड ऊर्जा असते पण त्यांना संधी मिळत नाही. योग्य संधी मिळाली तर महिला त्यांची योजकता सिद्ध करून दाखवितात.
लोकमतने सुरू केलेल्या या उपक्रमाने महिलांमधील आत्मविश्वास बळावला, असे मत तनुजा कंसल यांनी व्यक्त केले. याप्रसंगी मंडळाच्या सर्व सदस्या प्रामुख्याने उपस्थित होत्या. या उपक्रमात विविध उपक्रम आयोजित करण्यात आले.
गणेशोत्सवादरम्यान येथे रोज सायंकाळी ७ वाजता आरती आणि विविध स्पर्धांचे आयोजन महिलांतर्फेच करण्यात आले होते. लोकमतच्या सर्व महिला वाचकांनी तीचा गणपती या महिलांना सन्मान देणाऱ्या उत्सवात अधिकाधिक संख्येने उपस्थित राहण्याचे आवाहन लोकमततर्फे करण्यात आले आहे. लोकमत सखी मंच महिलांचा मंच आहे.
या मंचाने आपल्या अनोख्या उपक्रमाच्या माध्यमातून केवळ महिलांच्या कलागुणांना प्रोत्साहन देण्याचेच कार्य केले नाही तर त्यांना आत्मसन्मान लाभावा यासाठीही अनेक उपक्रम राबविले आहेत. महिलांना सन्मान देण्यासाठी लोकमतने सुरू केलेल्या ‘तीचा गणपती’ उपक्रमाला महिलांनी उत्स्फूर्त प्रतिसाद दिला. (प्रतिनिधी)