नागपुरात ट्रकच्या धडकेत तरुणीचा मृत्यू

ट्रकच्या धडकेत एका तरुणीचा मृत्यू झाला. हा अपघात मंगळवारी सकाळी ११.३० वाजताच्या सुमारास जरीपटका हद्दीत कामठी रोड नाका नंबर २ जवळ घडला.

ठळक मुद्देकामठी रोड वरील अपघातएचडीएफसी बँकेत जॉबच्या मुलाखतीसाठी जाताना काळाने गाठले

लोकमत न्यूज नेटवर्क
नागपूर : ट्रकच्या धडकेत एका तरुणीचा मृत्यू झाला. हा अपघात मंगळवारी सकाळी ११.३० वाजताच्या सुमारास जरीपटका हद्दीत कामठी रोड नाका नंबर २ जवळ घडला. अपराजिता नरेंद्र बोरकर (२४) रा. संताजीनगर कांद्री कन्हान असे मृत तरुणीचे नाव आहे.
मिळालेल्या माहितीनुसार अपराजिताने एमबीए पूर्ण केले होते. ती एचडीएफसी बँकेत जॉबच्या मुलाखतीसाठी जात होती. आपल्या दुचाकीने (क्र. एमएच ४०/एएस/५२४०)तीे नागपूरकडे रवाना झाली. या दरम्यान खैरी येथील रहिवासी हरपिंदरसिंग संधु (२५) ट्रक क्रमांक एमएच/३३/४५०० याने भरधाव आणि निष्काळजीपणे ट्रक चालवून अपराजिताच्या गाडीला मागून धडक दिली. ही धड इतकी मोठी होती की तरुणी सिमेंट रोडवर आदळली आणि ट्रकच्या मागच्या चाकात आल्याने तिचा घटनास्थळीच मृत्यू झाला. या अपघातानंतर ट्रक चालक आरोपी ट्रक सोडून पळाला. माहिती मिळताच जरीपटका पोलीस घटनास्थळी पोहोचले. पंचनामा करून मृतदेह पोस्टमार्टमसाठी पाठवण्यात आले. सायंकाळी कन्हान नदीच्या काठावर अपराजीतावर अंत्यसंस्कार करण्यात आले. पोलिसांनी ट्रक चालकास अटक केली.
वर्धा रोडवर कारच्या धडकेत एकाचा मृत्यू
भरधाव वेगात असलेल्या एका कारच्या धडकेत एका व्यक्तीचा मृत्यू झाला. ही घटना सोमवारी रात्री वर्धा रोडवर परसोडीजवळ घडली.
किशोर साधुजी वासेकर (५५) रा. श्रमिकनगर परसोडी असे मृताचे नाव आहे. सोमवारी रात्री ९ वाजता वासेकर हे वर्धा रोडवर सिंग ढाब्याजवळून परसोडीकडे पायी जात होते. दरम्यान वर्ध्याच्या दिशेने भरधाव वेगाने जात असलेल्या एका अज्ञात कार चालकाने वासेकरला जोरदार धडक दिली व पळून गेला. या अपघातात रस्त्यावर पडल्याने वासेकर यांच्या डोक्याला जबर मार बसून त्यांचा मृत्यू झाला. सिद्धांत वासेकर यांच्या तक्रारीवरून बेलतरोडी पोलिसांनी अज्ञात कार चालकाविरुद्ध गुन्हा दाखल केला आहे.