प्राणघातक हल्ल्यात तरुण जखमी

लाेकमत न्यूज नेटवर्क

काटाेल : जुन्या वैमनस्यातून प्रहार जनशक्तीचा शहरप्रमुख व त्याच्या भावाने तरुणासाेबत वाद उकरून काढला आणि त्याच्यावर लाेखंडी राॅडने वार केले. त्यात तरुण गंभीर जखमी झाला असून, पाेलिसांनी दाेन्ही आराेपींना अटक केली. ही घटना काटाेल शहरात मंगळवारी (दि. ५) रात्री ९.३० वाजताच्या सुमारास घडली.

मंगेश बापूराव शिरपूरकर (रा. धंतोली, काटाेल) असे जखमीचे तर आशिष जयस्वाल व आनंद ऊर्फ अन्नू जयस्वाल (दाेघेही रा. काटाेल) अशी अटकेतील आराेपींची नावे आहेत. आशिष जयस्वाल प्रहार जनशक्तीचे काटाेल शहर प्रमुख आहेत. मंगेश धंताेलीत कपडे प्रेस करण्याचे काम करताे तर जयस्वाल यांचे बिअरबार आहे. वाहने उभी करण्यावरून त्या दाेघांमध्ये नेहमीच वाद व्हायचा. दाेन महिन्यांपूर्वी त्यांच्यात भांडण झाले हाेते. याच भांडणाचा वचपा काढण्यासाठी आशिष व आनंद यांनी मंगेशसाेबत वाद उकरून काढला व त्याला अश्लील शिवीगाळ करीत लाेखंडी राॅडने मारहाण केली. शिवाय, त्याला जीवे मारण्याची धमकीही दिली. मंगेशवर काटाेल येथील ग्रामीण रुग्णालयात प्रथमाेपचार केल्यानंतर त्याला नागपूर येथील हाॅस्पिटलमध्ये भरती केले आहे.

या प्रकरणात पाेलिसांनी दाेन्ही आराेपींना अटक केली असून, त्यांना न्यायालयात हजर केले हाेते. न्यायालयाने दाेघांनाही जामीन नाकारला असून, त्यांना न्यायालयीन काेठडी सुनावल्याने त्यांची नागपूर येथील मध्यवर्ती कारागृहात रवानगी करण्यात आली, अशी माहिती ठाणेदार तथा तपास अधिकारी महादेव आचरेकर यांनी दिली. याप्रकरणी काटाेल पाेलिसांनी रंजना नंदकिशाेर शिरपूरकर यांच्या तक्रारीवरून भादंवि ३२६, ३४ अन्वये गुनहा नाेंदविला आहे.