चॉकलेटचे आमिष देत ६ वर्षीय चिमुकलीवर अत्याचार; नराधमास पोलीस कोठडी

अर्धापूर तालुक्यातील कामठा बु. येथील घटना

- गोविंद टेकाळे 
अर्धापूर ( नांदेड ) : कामठा बु. येथील एका सहा वर्षाच्या चिमुकलीवर चॉकलेटचे आमिष देऊन अत्याचार झाल्याची घटना घडली होती. याप्रकरणी अर्धापूर पोलिसांनी आरोपी राहुल इंगोले यास न्यायालयात हजर केले असता त्यास १७ फेब्रुवारीपर्यंत पोलीस कोठडी सुनावण्यात आल्याची माहिती पोलीस निरीक्षक हनुमंत गायकवाड यांनी दिली. 

अर्धापूर तालुक्यातील कामठा बु. येथील एका सहा वर्षाच्या बालिकेस सोमवारी ( दि.१३ ) चॉकलेटचे आमिष दाखवून २० वर्षिय तरुण राहुल संजय इंगोले ( रा कामठा बु.ता. अर्धापूर ) याने सोबत नेले. त्यांनतर पुलाखालील पाईपमध्ये नेऊन मारहाण करून चिमुकलीवर अत्याचार केला. सदर घटनेची माहिती मिळताच स.पो.अधीक्षक गोहर हसन,पोलीस निरीक्षक हनुमंत गायकवाड यांनी घटनास्थळी धाव घेतली.

एका महिलेच्या फिर्यादीवरून दि.१३ रोजी अर्धापूर पोलीस ठाण्यात अत्याचार, बाललैंगिक प्रतिबंध कायदा २०१२ पॉक्सो नुसार गुन्हा दाखल झाला. पोलिसांनी आरोपी राहुल संजय इंगोले यास अटक केली. मंगळवारी न्यायालयात हजर केले असता आरोपीस १७ फेब्रुवारी पर्यंत पोलीस कोठडी सुनावण्यात आली. या प्रकरणी पोलीस निरीक्षक हनुमंत गायकवाड यांच्या मार्गदर्शनाखाली पोउनी बळीराम राठोड हे पुढील तपास करीत आहेत.