कुंटूर येथे रक्तदान शिबिर

दिव्यांगांना लाभ द्यावा

बोधडी - किनवट तालुक्यातील दिव्यांगांना घरकूल योजनेचा लाभ देण्यात यावा अशी मागणी जिल्हाधिकारी तथा मुख्यमंत्र्यांकडे करण्यात आली. दिव्यांग बांधव कुडांच्या तथा तट्ट्यांच्या घरामध्ये राहतात. प्रत्येक ग्रामपंचायतीने १० घरे दिव्यांगांसाठी राखीव ठेवावीत, प्रत्येक अपंगाला घरकूल योजनेचा लाभ देण्यात यावा अशी मागणीही निवेदनात करण्यात आली.

महामार्गावर खड्डे

मारतळा - नांदेड - हैदराबाद राज्य महामार्ग क्रमांक १६१ वर मोठे खड्डे पडल्याने सदर खड्डे जीवघेणे ठरत असून मारतळा बसथांबा जवळील खड्ड्यामुळे अनेकदा दुचाकीस्वारांचा अपघात ही झाला आहे. भविष्यातही अपघात होण्याची शक्यता असल्यामुळे संबंधितांनी याकडे लक्ष देण्याची मागणी होत आहे.

ज्वारीचे मोठे नुकसान

बोधडी - बोधडी व परिसरात सोमवारी दुपारी अवकाळी पाऊस पडल्याने ज्वारी, तीळ, भुईमुगाचे मोठे नुकसान झाले. काही शेतकऱ्यांच्या काढणीला आलेला भुईमूग ही खराब झाला. यामुळे मोठे नुकसान झाल्याचे शेतकऱ्यांनी सांगितले. तहसील विभागाने नुकसानीचे पंचनामे करून भरपाई देण्याची मागणी होत आहे.

४२२ जणांना कोरोना लस

लोहा - तालुक्यातील पोलीसवाडी येथील सर्व ग्रामस्थांनी कोरोनाला हरवण्याचा चंग बांधला. गावातील ४२२ नागरिकांनी कोरोनाची पहिली लस घेतली आहे. यावेळी सरपंच अनिता धुळगुंडे, उपसरपंच लक्ष्मण कवडे, पिराजी धुळगुंडे, ग्रा.पं. सदस्य ज्ञानेश्वर बाजगीर, गोविंद कोल्हे, नागराव कोल्हे, रेखा बाजगीर, फुलूबाई कोल्हे आदी उपस्थित होते. यासाठी डॉ.धनवे, डॉ. बडे, गोपलवाड, गलपवाड, फाजगे यांनी परिश्रम घेतले. विशेष म्हणजे पोलीसवाडीत आजपर्यंत एकही पॉझिटिव्ह रुग्ण आढळला नाही.

सॅनिटायझर फवारणी

बिलोली - बिलोली पासून ७ किमी. अंतरावरील बावलगाव येथे सॅनिटायझर फवारणी करण्यात आली. याकामी शिवकुमार पटणे व गंगाधर पाटील यांनी पुढाकार घेतला. यावेळी उपसरपंच रमेश छप्पेवार, ग्रामपंचायत सदस्य दत्ता पाटील, रामचंद्र ठोमसे, शिवराम ठोमसे आदी उपस्थित होते.

खानापूरला लस हवी

देगलूर - तालुक्यातील खानापूर लसीकरण केंद्रावर कोरोना प्रतिबंधक लसींचा तुटवडा जाणवत आहे. संबंधितांनी लस उपलब्ध करून द्यावी अशी मागणी होत आहे. लस नसल्याची माहिती नसल्याने अनेकजण लसीकरण केंद्रावर जाऊन परतत आहेत. खानापूर हे मध्यवर्ती ठिकाण असून परिसरातील नागरिक ही या ठिकाणी लसीकरणासाठी येत आहेत.

लाभार्थ्यांची मागणी

किनवट - सार्वजनिक वितरण व्यवस्थेच्या स्वस्त धान्य दुकानात गहू ऐवजी मका दिली जाते. मक्याचा दर्जा निकृष्ट असून त्याऐवजी गव्हाचा पुरवठा करावा अशी मागणी होत आहे. स्वस्त धान्य दुकानांमार्फत दर महिन्याला धान्याचा पुरवठा होतो. केंद्र सरकारने मे व जून महिन्यात मोफत धान्य देण्याचे आश्वासन दिले होते. त्यात गव्हाचा पुरवठा कमी करून मका देणे सुरू केले होते. मात्र मक्याचा दर्जा चांगला नाही.

गोरोबा काका पुण्यतिथी

लोहा - संत गोरोबा काका यांच्या पुण्यतिथीचा कार्यक्रम रविवारी पार पडला. यानिमित्ताने अखिल महाराष्ट्र कुंभार समाज विकास संस्थेच्या वतीने शामराजे, राज्य युवक संपर्क प्रमुख श्रीराम तेलंग, नांदेड जिल्हा युवक अध्यक्ष बालाजी जोरुळे यांनी गोरोबा काका यांच्या प्रतिमेचे घरीच पूजन करावे, सार्वजनिक ठिकाणी धार्मिक कार्यक्रमाचे आयोजन करू नये असे आवाहन केले होते.

सिडको, हडकोत फवारणी

नांदेड - शहर महानगर पालिकेच्या आरोग्य विभागाच्या वतीने सिडको हडको परिसरातील मुख्य बाजारपेठेसह अंतर्गत भागात निर्जंतुकीकरण फवारणी करण्यात आली. क्रांती चौक, अण्णाभाऊ साठे चौक, छत्रपती शिवाजी चौक यासह मुख्य बाजारपेठेत फवारणी करण्यात आली. आरोग्य विभागाचे कर्मचारी बाबू गिरेवार, व्यंकट मगरे, राजेंद्र आढावे, राजू चव्हाण, संजय वाघमारे यांनी याकामी सहकार्य केले.

ग्रामीण भागात फळांना मागणी

मुदखेड - कोरोना प्रादुर्भावाच्या पार्श्वभूमीवर बाजारपेठ बंद असली तरी ग्रामीण भागात हातगाड्यांवरील फळांना मागणी वाढत आहे. यामध्ये संत्री, मोसंबी, नारळ पाणी, अंगूर, सफरचंद, डाळिंब या फळांची विक्री वाढली. उन्हाच्या तीव्रतेनं टरबूज, खरबुजाची ही मागणी वाढली आहे.

कारागिरांवर उपासमार

नायगाव - कोरोना प्रादुर्भाव रोखण्यासाठी जिल्हा प्रशासनाने मागील काही दिवसापासून आठवडे बाजार बंद पडले आहे. त्यामुळे उन्हाळ्याच्या दिवसात मातीचे माठ तयार करून ते आठवडे बाजारात विक्री करणारे व्यावसायिक अडचणीत आले. त्यांचा उदरनिर्वाहाचा प्रश्न निर्माण झाला आहे.

कारवाई ठप्प

हदगाव - मास्कचा वापर न करता फिरणाऱ्या नागरिकांवर केलेली जाणारी कारवाई आता ठप्प पडली आहे. नगरपालिकेचे पथक गायब झाले. अनेक नागरिक विनामास्क फिरत असल्याने कोरोनाचा धोका वाढला आहे.

डिझेल ही शंभरीच्या उंबरठ्यावर

नांदेड - जिल्ह्यात पेट्रोलच्या दराने पुन्हा एकदा शंभरी गाठली असून डिझेल ही शंभरीच्या उंबरठ्यावर आहे. त्यामुळे वाहनधारकांना आर्थिक झळ सहन करावी लागत आहे. नागरिकांनाही त्याचा फटका बसत आहे.

इसम हरवल्याची नोंद

नायगाव - नायगाव तालुक्यातील बेंद्री येथील व्यंकटराव लक्ष्मण हणमंते (वय ४६) हे १५ एप्रिल २०२१ पासून गायब आहेत. हंगरगा येथे जातो म्हणून ते घराबाहेर पडले. ते आजपर्यंत घरी परतलेच नाहीत. नायगाव पोलिसांनी या घटनेची नोंद घेतली आहे.

सोयाबीन उगवण प्रात्यक्षिक

लोहा - तालुक्यातील सायाळ येथे प्रगतशील शेतकरी रत्नाकर पाटील ढगे यांच्या शेतात कृषी विभागाच्या वतीने सोयाबीन प्रात्यक्षिक उपक्रम राबविण्यात आला. कृषी सहाय्यक लक्ष्मण दुधाटे यांनी प्रात्यक्षिक करून दाखविले. शेतकऱ्यांनी सोयाबीन बियाणे उगवणशक्ती तपासल्याशिवाय पेरणी करू नये, शेतकऱ्यांनी घरची सोयाबीन बियाणे पेरणीस निवडावे असे आवाहन दुधाटे यांनी केले. यावेळी रत्नाकर पाटील, भगवान मोरताटे, प्रल्हाद ढगे, हिरामण मोरताटे, अच्युत ढगे, उत्तम ढगे आदी उपस्थित होते.