ब्रेक द चेन,' आरटीओ' कार्यालय ३० एप्रिलपर्यंत बंद

नांदेड जिल्ह्यात कोरोना विषाणूचा प्रसार होऊ नये, यास्तव प्रतिबंधात्मक तथा खबरदारीचा उपाय म्हणून शासनाने वेळोवेळी निर्देश जारी केले आहेत. प्रादेशिक परिवहन कार्यालयातील शिकाऊ अनुज्ञप्ती तथा 'लर्निंग' लायसन्स, पक्की अनुज्ञप्ती चाचणी अर्थातच 'परमनंट' लायसेन्सची टेस्ट आदी कार्यालयीन कामकाज नियंत्रित केले, तरी गर्दी रोखणे सद्याच्या परिस्थितीत शक्य होत नाही. दरम्यान, जिल्हाधिकारी यांच्यामार्फत जिल्ह्यात कलम १४४ लागू केलेले असून, त्यानुसार पाचपेक्षा जास्त लोकांना सार्वजनिक ठिकाणी एकत्र फिरण्यास तथा एकत्र जमा होण्यास प्रतिबंधित केले आहे. आरटीओ कार्यालयात दैनंदिन कामकाजासाठी येणाऱ्या अर्जदारांची संख्या अधिक असल्याने जमावबंदी आदेशाचेही उल्लंघन होत असल्याचे परिवहन अधिकाऱ्यांच्या निदर्शनास आले आहे. तर सद्य:परिस्थितीत नांदेडच्या आरटीओ कार्यालयात कार्यरत २० अधिकारी, कर्मचारी तसेच त्यांच्या कुटुंबीयांना कोरोनाची लागण झाली आहे. या परिस्थितीस वेळीच प्रतिबंध नाही केल्यास, कार्यालयातील उर्वरित अधिकारी तथा कर्मचाऱ्यांनाही संसर्ग होण्याची दाट शक्यता आहे. दरम्यान, मुख्य सचिव, महसूल व वनविभाग, आपत्ती व्यवस्थापन, मुंबई तसेच अपर परिवहन आयुक्त, म.रा. मुंबई, आणि नांदेड येथील जिल्हाधिकारी यांच्या आदेशानुसार व कोरोनाचा प्रादुर्भाव रोखण्यासाठी ७ एप्रिल ते ३० एप्रिल २०२१ या कालावधीत प्रादेशिक परिवहन कार्यालयातील खटला विभाग व आस्थापना विभाग वगळता कार्यालयातील संपूर्ण दैनंदिन कामकाज बंद करण्यात येत आहे.

ज्यांनी शिकाऊ (लर्निंग) व पक्की (परमनंट लायसेन्स) अनुज्ञप्तीसाठी अपॉईंटमेंट घेतल्या आहे, त्यांनी त्या अपॉईंटमेंट रद्द करून आपले सोईप्रमाणे पुन्हा नवीन अपॉईंटमेंट घ्याव्यात. जुनी अपॉईंटमेंट रद्द करणे व पुन्हा नवीन अपॉईंटमेंट घेणे, ही प्रक्रिया ऑनलाइन असून, त्याकरिता पुन्हा कोणतेही 'अतिरिक्त शुल्क' आकारले जात नाही. ३० एप्रिलनंतर कार्यालय तत्कालीन शासन निर्णयानुसार कार्यरत असेल. - शैलेश कामत, प्रादेशिक परिवहन अधिकारी, नांदेड.