वीज ग्राहकांची ऑनलाईनला पसंती, बिलोपाटी भरले २७.६० कोटी रूपये

नांदेड : लघुदाब वर्गवारीतील वीज ग्राहकांना घरबसल्या वीजबिलांचा भरणा करण्याची ‘ऑनलाईन’ सोय उपलब्ध करून दिल्यानंतर राज्यभरातील ६५ लाख वीज ग्राहकांनी दरमहा सरासरी १,४१६ कोटी रुपयांचा ‘ऑनलाईन’ भरणा केला आहे. यामध्ये नांदेड परिमंडळातील १ लाख ४० हजार वीज ग्राहकांनी २७ कोटी ६ लाख रूपयांचा भरणा केला आहे. वेबसाईट व मोबाईल ॲप तसेच अन्य पर्यायांद्वारे ‘ऑनलाईन’ वीजबिल भरणा क्रेडिट कार्ड वगळता निःशुल्क केला आहे. कोरोना विषाणू संसर्गाच्या काळात गर्दी टाळून घरबसल्या ऑनलाईन वीजबिल भरण्याची सोय उपलब्ध आहे.

महावितरणने लघुदाब वीज ग्राहकांना ऑनलाईन बिल भरण्यासाठी वेबसाईट तसेच जून २०१६पासून मोबाईल ॲपद्वारे चालू व मागील वीजबिल पाहणे आणि त्याचा ऑनलाईन भरणा करण्यासाठी नेट बॅंकिंग, क्रेडिट/डेबिट कार्डसह मोबाईल वाॅलेट व कॅश कार्ड्सचा पर्याय उपलब्ध करून दिला आहे. वीज ग्राहकांना त्यांच्या एकाच खात्यातून स्वतःच्या अनेक वीज जोडण्यांबाबतही सेवा उपलब्ध आहे. त्यामुळे वीजबिल भरणा केंद्रात जाऊन रांगेत उभे राहण्याऐवजी ‘ऑनलाईन’ वीजबिल भरण्याला ग्राहकांनी पसंती दिली आहे.

लघुदाब वीज ग्राहकांना ऑनलाईन बिल भरण्यासाठी दरमहा ५०० रुपयांच्या मर्यादेत ०.२५ टक्के सूट देण्यात येत आहे. क्रेडिट कार्ड, डेबिट कार्ड, युपीआय, भीम, इंटरनेट बॅंकिंग, मोबाईल वॉलेट, मोबाईल बॅंकिंगद्वारे वीजबिल भरणा केल्यास वीज देयकामध्ये ०.२५ टक्के सूट देण्यात येत आहे. याआधी नेटबॅंकिंगचा अपवाद वगळता वीजबिलांचा ‘ऑनलाईन’ भरणा करण्यासाठी ५०० रुपयांपेक्षा अधिक रकमेवर शुल्क आकारण्यात येत होते. परंतु, क्रेडिट कार्ड वगळता नेटबॅंकिंग, डेबिट कार्ड, कॅशकार्ड, युपीआय, डिजिटल वॉलेटच्या माध्यमातून ‘ऑनलाईन’द्वारे होणारा वीजबिल भरणा आता निःशुल्क आहे.

‘ऑनलाईन’द्वारे वीजबिल भरणा केल्यानंतर लगेचच ग्राहकाच्या नोंदणीकृत मोबाईल क्रमांकावर ‘एसएमएस’द्वारे पोच देण्यात येत आहे. याशिवाय महावितरणच्या वेबसाईटवर व मोबाईल ॲपवर मागील वर्षभराच्या बिलांचा तपशील व रक्कम भरल्याची पावती उपलब्ध आहे. यासोबतच लघुदाब वर्गवारीतील औद्योगिक, वाणिज्यिक व घरगुती ग्राहकांचे वीजबिल १० हजार रुपयांपेक्षा अधिक असल्यास त्यांना ‘आरटीजीएस’ किंवा ‘एनईएफटी’द्वारे थेट वीजबिल भरण्याची सोय उपलब्ध करून देण्यात आली आहे. त्यासाठी संबंधित ग्राहकांच्या वीजबिलांवर महावितरणच्या बँक खात्याचा तपशीलदेखील देण्यात येत आहे.