नांदेड हादरले! प्रसिद्ध व्यावसायिक संजय बियाणींवर घराजवळ गोळीबार

मागीलवर्षी जीवे मारण्याच्या धमकीनंतर त्यांना सुरक्षारक्षक देण्यात आला होता, काही दिवसांपूर्वीचा सुरक्षारक्षक काढण्यात आला आणि आज ही घटना घडली

नांदेड: नांदेडमध्ये बांधकाम व्यावसायिक संजय बियाणी यांच्यावर त्यांच्याच घरासमोर स्पोर्ट बाईकवर आलेल्या दोघांनी गोळीबार केल्याची खळबळजनक घटना आज सकाळी साडेअकरा वाजेच्या सुमारास शारदा नगर येथे घडली. या गोळीबारात बियाणी आणि त्यांचा चालक गंभीर जखमी झाला आहे. या दोन्ही जखमींवर शहरातील एका खाजगी रुग्णालयात उपचार सुरू आहेत. 

पोलीस घटनास्थळी दाखल  झाले असून हा गोळीबार कुणी केला ? याचा शोध घेतायत. दरम्यान, गंभीर जखमी बियाणी यांची प्रकृती चिंताजनक असल्याने शहरात तणावाचे वातावरण पसरले आहे. संजय बियाणी हे नांदेडमधले मोठे प्रस्थ असून खंडणीच्या वसुलीसाठी किंवा व्यावसायिक स्पर्धेतून हा गोळीबार झाल्याचा प्राथमिक अंदाज आहे. दरम्यान, गोळीबाराची घटना सीसीटीव्हीमध्ये चित्रित झालीय का याचा शोध घेणे सुरू आहे. 

दरम्यान, मागील वर्षी बियाणी यांना खंडणी साठी जीवे मारण्याची धमकी देण्यात आली होती. त्यानंतर त्यांना सुरक्षा रक्षक देण्यात आला होता. परंतु काही दिवसांपूर्वी त्यांचा सुरक्षा रक्षक काढण्यात आला होता. त्यात आता ही घटना घडली. नांदेडमध्ये गावठी पिस्तुलांचा सुळसुळाट झाला असून गोळीबाराच्या घटना आता अगदीच सामान्य होत चालल्या आहेत, त्यामुळे कायदा आणि सुव्यवस्थेचे धिंडवडे निघाले आहेत. आजच्या या घटनेनंतर शहरातील व्यापारी वर्गात मोठी दहशत पसरली आहे.