वीज कडाडताच मोबाइल करा बंद; झाडांपासून राहा दूर!

नांदेड : गेल्या काही दिवसांपासून जिल्ह्याला पावसाचा जोर वाढला आहे. त्याचबरोबर, विजाही कोसळत आहेत. याच काळात शेतीकामे सुरू असतात. त्यामुळे वीज पडून शेतकऱ्याचा मृत्यू झाल्याच्या घटना दरवर्षी घडत असतात. त्यामुळे आकाशात विजा कडाडत असताना नागरिकांनी काही खबरदारी घेण्याची गरज आहे.

आजघडीला प्रत्येकाजवळ मोबाइल आहे. त्यामुळे विजांचा कडकडाट होत असताना, सर्वप्रथम आपल्याजवळील मोबाइल बंद करणे आवश्यक आहे, तसेच झाडांपासून शक्यतो दूरच राहावे. कारण झाडावरच सर्वाधिक वीज कोसळण्याचा धोका असतो. झाडाखाली आसऱ्यासाठी थांबलेल्या अनेक शेतकऱ्यांचा वीज पडल्याने मृत्यू झाला आहे.

घरात असताना घ्या खबरदारी

n विजेच्या गडगडाटासह पावसाची पूर्वकल्पना असल्यास घराबाहेर पडणे शक्यतो टाळा, जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल, तर सखल जागेत जाऊन गुडघ्यात डोके घालून बसा.

n आकाशात विजा चमकत असताना घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका. आपण घरात असाल, तर घरातील विद्युत उपकरणे त्वरित बंद करा. पाण्यात उभे असाल, तर तत्काळ पाण्याबाहेर पडा. तारांचे कुंपण, विजेचे खांब व इतर लोखंडी वस्तूपासून दूर राहा, तसेच मोबाइल बंद करा आणि लँडलाइनचा वापर करू नका.

सर्वाधिक मृत्यू शेतकऱ्यांचे

विजा पडून जिल्ह्यात सर्वाधिक मृत्यू हे शेतकऱ्यांचे झाले आहेत. शेतात काम करीत असताना, विजांच्या कडकडाटासह पाऊस झाल्यास शेतकरी आणि मजूर हे जवळ असलेल्या झाडाखाली आसरा घेतात. विशेष करून, झाडावरच अधिक वीज कोसळण्याचा धोका असतो. त्यामुळे शेतकऱ्यांनी विशेष काळजी घेण्याची गरज आहे. झाडाखाली थांबण्याऐवजी उघड्या मैदानात थांबावे. लोखंडी शेड किंवा उंच झाडाचा आसरा घेऊ नये. अशा प्रकारे खबरदारी बाळगल्यास हे मृत्यू रोखता येणार आहेत.