सावरगाव (माळ ) च्या सरपंचपदी शीतल पाद्रे, तर उपसरपंचपदी गिरजाबाई जोगदंड यांची बिनविरोध निवड

नांदेड : हदगाव तालुक्यातील सावरगाव (माळ) येथील सरपंच व उपसरपंच पदाची निवड बुधवारी ग्रामपंचायत कार्यालयात घेण्यात आली. यामध्ये बुद्धिजीवी विकास पॅनलच्या सदस्य शीतल पाद्रे, तर उपसरपंचपदी यशदा पुणे येथील अधिकारी डॉ. बबन जोगदंड यांच्या मातोश्री गिरजाबाई जोगदंड यांची बिनविरोध निवड झाली.

हादगाव तालुक्यातील एक मोठे गाव म्हणून या गावाकडे पाहिले जाते. या गावाची लोकसंख्या सहा हजार आहे. या गावामध्ये ११ सदस्य निवडून आले. त्यापैकी आठ सदस्य बुद्धिजीवी विकास पॅनलचे निवडून आले. या आठ सदस्यांपैकी दोघा जणांची सरपंच, उपसरपंच म्हणून निवड झाली. निवड प्रक्रिया अध्यासी अधिकारी एन. एस. देशमुख यांच्या अध्यक्षतेखाली घेण्यात आली. यावेळी तलाठी जे.पी. गाडे ग्रामविकास अधिकारी बी.पी. मळगे यांची उपस्थिती होती. सरपंच, उपसरपंचांचा गावकऱ्यांच्या वतीने सत्कार करण्यात आला.