शोधमोहिमेच्या दोन दिवसांत कुष्ठरोगाचे ५१, तर क्षयरोगाचे २९ संशयित रुग्ण

कंधार : तालुक्यात १ डिसेंबरपासून संयुक्त कुष्ठ व क्षयरोगाची शोधमोहीम राबविली जात आहे. पाच प्राथमिक आरोग्य केंद्रांतंर्गत असलेल्या गावांत २ दिवसांत ६ हजार १५० कुटुंबांना आरोग्य पथकाने भेट दिली. त्यात कुष्ठरोगाचे ५१ व क्षयरोगाचे २९ संशयित रुग्ण आढळले, अशी माहिती आरोग्य विभागाच्या शोधमोहिमेतून समोर आली आहे. सर्वाधिक कुष्ठरोगाचे संशयित रुग्ण बारूळ व पेठवडज केंद्रांतर्गत गावात प्रत्येकी १७ आढळले आहेत.

तालुक्यात १ डिसेंबर ते १६ डिसेंबर या कालावधीत घरोघरी भेट देऊन संयुक्त कुष्ठरोग व क्षयरोग शोधमोहीम राबविण्यात येत आहे. एकूण २ लाख १० हजार लोकसंख्या व ४० हजार ६४० कुटुंबांना २४५ आरोग्य पथके भेट देत आहेत. तालुका आरोग्य अधिकारी डॉ. एस.पी. ढवळे यांच्या मार्गदर्शनाखाली सर्व प्रा.आ. केंद्राचे वैद्यकीय अधिकारी, तालुका पर्यवेक्षक शेख शादूल, कुष्ठरोग तंत्रज्ञ ई.बी. पठाडे, क्षयरोग पर्यवेक्षक एस.ए. मुक्कनवार, सिंधूताई केसाळे यांच्या सूचनेनुसार आशा, आरोग्य कर्मचारी, आरोग्यसेविका, स्वयंसेवक, अंगणवाडी कर्मचारी शोधमोहीम राबवीत आहेत. १ व २ डिसेंबर रोजी २९ हजार १६० लोकसंख्येला व ६ हजार १५० कुटुंबाला पथकाने घरोघरी भेटी दिल्या. त्यात संशयित रुग्ण आढळले असल्याचे समोर आले आहे.

पथके घरोघरी भेट देऊन शोधमोहीम राबवीत आहेत.

कुष्ठरोगाचे त्वचेवर फिकट-लालसर चट्टे असल्यास व त्याजागी घाम येत नसेल, तर त्वचेवर थंड व गरम संवेदना, तळहात-तळपायावर मुंग्या येणे, डोळे पूर्ण बंद करता न येणे, भुवयांचे केस विरळ होणे, जाड-बधिर -तेलकट चकाकणारी त्वचा, कानाच्या पाळ्या जाड आदी लक्षणे तपासली जात आहेत आणि ही लक्षणे आढळल्यास संशयित म्हणून नोंद घेतली जात आहे. अशा संशयित रुग्णांची तपासणी वैद्यकीय अधिकारी करतील. यासाठी संदर्भित केले जात आहे. त्यातील संशयित ५१ पैकी १२ जणांची तपासणी करण्यात आली आहे.

क्षयरोगाची लक्षणे दिसल्यास संशयित म्हणून नोंद केली जात आहे. त्यात वजनात लक्षणीय घट, सायंकाळी ताप, थुंकीतून रक्त पडणे व छातीत दुखणे, दोन आठवड्यांपेक्षा अधिक ताप, १४ दिवसांपेक्षा अधिक काळ खोकला आदी लक्षणे असल्यास संशयित म्हणून नोंद केली जात आहे आणि त्यांचे स्पुटन गोळा केले जात आहेत. थुंकीचे नमुने प्रयोगशाळेत पाठवले जाणार आहेत. मग निदान केले जाणार आहे. ६ जणांचे स्पुटन घेण्यात आल्याचे सांगण्यात आले.