नंदुरबार : आई-वडिलांच्या मारहाणीत मुलाचा पाय फॅक्चर

नंदुरबार - मुलाला दिला जाणारा प्लॉट आई-वडिलांनी परस्पर विक्री केल्याचा जाब मुलाने विचारल्याने आई-वडिलांनी केलेल्या बेदम मारहाणीत मुलाचा पाय फॅक्चर केल्याची घटना खर्डीपाडा, ता. धडगाव येथे घडली. याबाबत मुलाच्या फिर्यादीवरून आई-वडिलांविरुद्ध गुन्हा दाखल करण्यात आला आहे. पोलिस सूत्रांनुसार, धडगाव येथील तुकाराम खाज्या पावरा हे त्यांचा मुलगा संजय तुकाराम पावरा यांना त्यांचा मालकीचा प्लॉट देणार होते. परंतु तुकाराम पावरा यांनी तो प्लॉट परस्पर विकून टाकला.

ही बाब संजय यांना समजल्यावर त्यांनी वडील तुुकाराम पावरा यांना जाब विचारला. त्याचा राग आल्याने तुकाराम व त्यांची पत्नी गमलीबाई पावरा यांनी संजय यास बेदम मारहाण केली. काठीने पायावर मारहाण केल्याने त्यांचा पाय फॅक्चर झाला.

शिवाय हाताबुक्क्यांनी बेदम मारहाण केली. ठार मारण्याची धमकी दिली. याबाबत संजय पावरा यांनी फिर्याद दिल्याने तुकाराम पावरा (५५) व गमलीबाई पावरा (५०) यांच्याविरुद्ध धडगाव पोलिसात गुन्हा दाखल करण्यात आला आहे. तपास पोलिस कर्मचारी शशिकांत वसईकर करीत आहे.