नंदुरबारात दीड लाखाच्या तिजोरीसह १२ हजारांची रोकड लांबवली

शहरातील धुळे रोड भागात उज्ज्वल ऑटोमोटिव्ह या चारचाकी वाहनांच्या शोरूममधून चोरट्यांनी दीड लाख रूपये किमतीची डिजिटल तिजोरी चोरून नेली.

नंदुरबार : शहरातील धुळे रोड भागात उज्ज्वल ऑटोमोटिव्ह या चारचाकी वाहनांच्या शोरूममधून चोरट्यांनी दीड लाख रूपये किमतीची डिजिटल तिजोरी चोरून नेली. या तिजोरीत १२ हजार रुपयांची रोकड होती. गुरुवारी सकाळी शोरूम उघडल्यानंतर हा प्रकार समोर आला.

उज्ज्वल ऑटोमोटिव्हच्या शोरूममध्ये गुरुवारी पहाटेच्या सुमारास अज्ञात चोरट्यांनी प्रवेश करत आतील १ लाख ५० हजार रूपये किमतीची डिजिटल तिजोरी फोडण्याचा प्रयत्न केला होता. परंतु पासवर्ड असलेली ही तिजोरी न उघडल्याने चोरट्यांनी वजनी तिजोरी उचलून नेत पळ काढला. सकाळी शोरूम उघडल्यानंतर कर्मचारी आत आल्यावर त्यांच्या लक्षात आला.

या तिजोरीमध्ये १२ हजार ३२० रुपयांची रोकड असल्याची माहिती देण्यात आली आहे. याप्रकरणी ब्रँच मॅनेजर देवेंद्र जीवन पाटील यांनी नंदुरबार शहर पोलिस ठाण्यात दिलेल्या फिर्यादीवरून अज्ञात चोरट्याविरोधात गुन्हा दाखल करण्यात आला आहे. तपास सहायक पोलिस निरीक्षक नंदा पाटील करीत आहेत.