काँग्रेसचे इतरही नेते पक्षात येण्यास इच्छूक

लोकमत न्यूज नेटवर्क
नंदुरबार : भाजप हा कुठल्या एका गटाचा किंवा नेत्याचा पक्ष नाही तर यापूर्वीच्या पदाधिका:यांनी तळागाळात जावून वाढविलेला पक्ष आहे. त्यामुळे सर्वाना घेवून सर्वसमावेशक काम करणार असल्याचे भाजपचे जिल्हाध्यक्ष विजय चौधरी यांनी पत्रकारांशी बोलतांना सांगितले. दरम्यान, भरत गावीत यांच्यानंतर काँग्रेसमधील इतरही नेते पक्षात येण्यासाठी इच्छूक असल्याचे त्यांनी स्पष्ट केले. 
जिल्हाध्यक्ष पदाची जबाबदारी स्विकारल्यानंतर पत्रकारांशी बोलतांना त्यांनी सांगितले, पक्षाची लवकरच सर्वसमावेशक जिल्हा कार्यकारिणी जाहीर करण्यात येणार आहे. पक्षात यापुढे कुठलाही गट, तट राहणार नाही. केवळ भाजप हाच एक गट राहील या दृष्टीने आपण काम करणार आहोत. शतप्रतिशत भाजप हे आपले ध्येय राहणार आहे. भरत  गावीत यांच्यासह काँग्रेस आणि इतर पक्षांचे अनेक पदाधिकारी पक्षात येण्यासाठी इच्छूक असल्याचे त्यांनी सांगितले. पक्षातील सर्व ज्येष्ठ नेते, पदाधिकारी यांचे मार्गदर्शन घेवूनच आपण पक्ष कार्य करणार असल्याचे त्यांनी यावेळी स्पष्ट केले. यावेळी भाजपचे प्रदेश कार्यकारिणी सदस्य डॉ.शशिकांत वाणी, माजी जिल्हाध्यक्ष नागेश पाडवी, प्रकाश चौधरी, राजेंद्र शर्मा यांच्यासह कार्यकर्ते उपस्थित होते.