माजी जि.प.सदस्याच्या शेतातून दोन क्विंटल ५३ किलो गांजा जप्त

गुरुवारी रात्री ही कारवाई करण्यात आली.

नंदुरबार: माजी जिल्हा परिषद सदस्य असलेल्या सुनिल चव्हाण यांच्या नवानगर, ता.शहादा शिवारातील शेतातून स्थानिक गुन्हा अन्वेशन शाखेच्या पथकाने १७ लाख ७४ हजार रुपये किंमतीचा दोन क्विंटल ५३ किलो गांजा जप्त केला. गुरुवारी रात्री ही कारवाई करण्यात आली.

माजी जिल्हा परिषद सदस्य असलेले सुनिल मेरसिंग चव्हाण (४७) रा.नवानगर यांच्या शेतात गांजाची झाडे लावल्याची माहिती जिल्हा पोलिस अधिक्षक पी.आर.पाटील यांना मिळाली होती. त्यांनी स्थानिक गुन्हा शाखेचे पोलिस निरिक्षक किरणकुमार खेडकर यांना कारवाईच्या सुचना दिल्या. त्यानुसार पथकाने तेथे धाड टाकून तपासणी केली असता केळीच्या शेतात गांजाची झाडे लावल्याचे आढळून आले. एकुण दोन क्विंटल ५३ किलो गांजा जप्त करण्यात आला असून त्याची किंमत १७ लाख ७४ हजार रुपये इतकी आहे. शहादा पोलिस ठाण्यात याबाबत गुन्हा दाखल करण्यात आला आहे.