नंदुरबारात दोन ट्रकांची समोरासमोर धडक, एक ठार

हा अपघात नंदुरबार-दोंडाईचा रस्त्यावरील हॉटेल राजदरबार जवळ घडला.

नंदुरबार : भरधाव वेगाने जाणाऱ्या ट्रकांची समोरासमोर धडक झाल्याने घडलेल्या अपघातात चालक ठार असून, एक जण जखमी झाला आहे. हा अपघात नंदुरबार-दोंडाईचा रस्त्यावरील हॉटेल राजदरबार जवळ घडला.

नंदुरबार-दोंडाईचा रस्त्यावरून जात असताना शनिवारी सकाळी साडेसहा वाजेच्या सुमारास ट्रक क्रमांक एमएच २०- जीसी ११२६ व ट्रक क्रमांक एमएच १२- एनएक्स ३४६४) मध्ये जोरदार धडक झाली. ट्रकांवरील चालकांनी परिस्थितीकडे दुर्लक्ष करून भरधाव वेगाने वाहन चालविल्याने समोरून येणाऱ्या ट्रकला धडक दिली. या अपघातात ट्रक चालक शेख चांद शेख मोहमंद (२५) रा. खातगाव, ता. पैठण, जि. छत्रपती संभाजीनगर हा ठार झाला. तर नाजीज अजीज शेख, रा. रांजणगाव, ता. पैठण हा जखमी झाला आहे. दोन्ही वाहनांचे मोठ्या प्रमाणावर नुकसान झाले आहे.

भल्या सकाळी अपघात झाल्याने काही वेळ वाहतूक देखील ठप्प झाली होती. दरम्यान, दोन्ही वाहने रस्त्याच्या कडेला नेण्यात आली होती. अपघात घडल्यानंतर दोन्ही वाहनांचे कॅबिन चक्काचूर झाले आहे. याप्रकरणी नाजीर अजीज शेख यांच्या फिर्यादीवरून ट्रक क्रमांक (एमएच १२- एनएक्स ३४६४) वरील चालकाविरोधात नंदुरबार शहर पोलिस ठाण्यात गुन्हा दाखल करण्यात आला आहे. दरम्यान जखमींवर रुग्णालयात उपचार सुरू आहेत. याप्रकरणी पुढील तपास हवालदार वसंत वसावे करीत आहेत.