चिंचपाडा येथे दुचाकी चोरट्यास अटक

लोकमत न्यूज नेटवर्क
नवापूर :  तालुक्यातील चिंचपाडा दुरक्षेत्र पोलिसांनी सराईत मोटरसायकल चोरट्यास अटक केली असून त्याच्याकडून अवघ्या काही तासांतच चोरलेली ४० हजाराची एक मोटरसायकल जप्त केली आहे.
हनुमान उर्फ कानिथ उर्फ नवेश चित्त भोसले वय ३२ रा. नवे जामदा ता. साक्री जि. धुळे असे संशयीताचे नाव आहे. चिंचपाडा येथील जितेंद्र बजाज यांची  मोटरसायकल (क्रमांक ३९ एस ९७५७) ५ जानेवारी रोजी रात्री चोरीस गेली होती. संशयीत आरोपी हा  चिंचपाडा परिसरात असल्याची माहिती हवालदार दादाभाई वाघ व त्यांच्या पथकाला मिळाली. त्यानुसार चिंचपाडा दूरक्षेत्र पोलीस पथकाने आरोपीस मोठ्या शिताफीने मोटरसायकलसह संशयीताला रंगेहात पकडले. त्याच्या जवळील मोटरसायकलीच्या कागदपत्र बाबत विचारणा केली असता त्याने उडवाउडवीची उत्तरे देऊन पळून जाण्याचा प्रयत्न करीत असताना त्यास पथकाने शिताफीने पकडले. त्याच्या ताब्यातील मोटरसायकल ही जितेंद्र बजाज रा. चिंचपाडा येथील मिशन दवाखान्या जवळील आदर्श कॉलनी या ठिकाणाहून चोरीस गेली असल्याची खात्री झाली. त्याने तळोदा, शहादा, दोंडाईचा, उपनगर नंदुरबार, धुळे जिल्ह्यासह गुजरात राज्यातील बारडोली, वालोड, पलसाणा या ठिकाणी वाहन चोरी व घरफोडी यासारखे विविध गुन्ह्यांमध्ये पोलीस ठाण्यात नोंद असल्याची माहिती समोर आली आहे. 
पोलिस निरीक्षक बाळासाहेब भापकर यांच्या मार्गदर्शनाखाली चिंचपाडा दुरक्षेत्र पोलिस  दादाभाई वाघ, जितेंद्र चव्हाण, सुनिल बर्वे, योगेश तनपुरे यांच्या पथकाने ही कारवाई   केली.