कुकरमुंडा येथील तापी पुलावरुन उडी घेत ग्रामसेवकाची आत्महत्या

लोकमत न्यूज नेटवर्क
अक्कलकुवा : तालुक्यातील रामपुर तालंबा ग्रामपंचायतीचे ग्रामसेवक महेंद्र जाधव यांनी तापी नदी पुलावरून उडी घेत आत्महत्या केल्याची घटना काल सायंकाळी घडली होती़ त्यांचा मृतदेह हाती लागला नसल्याची माहिती आहे़
ग्रामसेवक महेंद्र श्रावण जाधव हे सोमवारी सायंकाळी नंदुरबार येथे अक्कलकुव्याकडे जात असताना गुजरात राज्यातील कुकरमुंडा येथील तापी नदीच्या पुलाजवळ गाडी थांबवून थेट तापी नदीच्या पात्रात उडी टाकली़ कुकरमुुंडा पोलीसांनी घटनास्थळावरील मोटारसायकलवरुन ओळख पटवल्यानंतर अक्कलकुव्यात या घटनेची माहिती मिळाली होती़ आत्महत्येचे कारण अद्याप समजू शकलेले नाही़
नंदुरबार येथील रहिवासी असलेले जाधव हे सोमवारी ग्रामसेवकांच्या बैठकीला हजर नसल्याचे सांगण्यात आले आहे़ कुकरमुंडा पोलीस रात्री उशीरापर्यंत मृतदेहाचा शोध घेत होते़