वाळूच्या अकरा डंपरवर आरटीओकडून सोळा लाख दंडाची आकारणी

सटाणा : पोलिसांनी मुजोर वाळूमाफियांच्या मुसक्या आवळण्यासाठी गेल्या बुधवारी विशेष मोहीम हाती घेत तब्बल अकरा वाळूचे डंपर पकडले होते.

लोकमत न्यूज नेटवर्क
 सटाणा : बागलाण तालुक्यातील जायखेडा आणि सटाणा पोलिसांनी मुजोर वाळूमाफियांच्या मुसक्या आवळण्यासाठी गेल्या बुधवारी विशेष मोहीम हाती घेत तब्बल अकरा वाळूचे डंपर पकडले होते. पोलिसांनी पकडलेल्या वाळूच्या सर्वच डंपरचे वजन केल्यामुळे प्रादेशिक परिवहन विभागाचे अधिकारीही खडबडून जागे झाले आणि त्यांना सोळा लाख रु पये दंड भरून घेण्यास भाग पाडले. एकीकडे आरटीओ कारवाई करून मोकळे झाले असताना, दुसरीकडे मात्र महसूल यंत्रणा अजूनही चुप्पी साधून आहे. अद्यापही कारवाई न केल्याने यंत्रणा संशयाच्या भोवऱ्यात सापडली आहे.
तापी नदीमधून बेसुमार वाळू उपसा करून विनापरवाना नाशिक, ठाणे, मुंबई या बड्या शहरांमध्ये वाळू पुरवठा करणारे मोठे रॅकेट कार्यरत आहे. या रॅकेटमध्ये राजकारणातील अनेक बड्या हस्तीदेखील पार्टनर असल्यामुळे राजरोस वाळू तस्करीचा गोरखधंदा तेजीत सुरू आहे. शहादा, नंदुरबार परिसरातील तापी नदीपात्रातून दररोज सुमारे दीडशे डंपर वाळूची बेकायदा वाहतूक होते. वाळूच्या ओव्हरलोडमुळे रस्त्यांची वाट लागते, तर वाळू चोरीमुळे शासनाचा दररोज कोट्यवधी रु पयांचा महसूल बुडतो आहे. असे असताना पोलीस यंत्रणेशी हमरीतुमरीची भाषा वापरणाऱ्या मुजोर वाळूमाफियांच्या मुसक्या आवळण्यासाठी गेल्या बुधवारी जायखेडा व सटाणा पोलिसांनी संयुक्त मोहीम हाती घेतली आणि तब्बल अकरा वाळूचे डंपर पकडले. यामुळे वाळूमाफियांचे चांगलेच धाबे दणाणले. सटाणा पोलीस ठाण्याच्या इतिहासात वाळूमाफियांविरुद्ध पहिलीच कारवाई होती. पोलिसांनी वाळूमाफिया मोकळे सुटायला नको म्हणून वाळूचे डंपर पकडल्यानंतर तत्काळ त्यांचा काटा करून सर्वच वाहने जप्त करण्यात आली. त्यानुसार पोलिसांनी आपल्या कारवाईचा अहवाल मालेगाव प्रादेशिक परिवहन विभागाला सादर केला. अधिकाऱ्यांनी तत्काळ वाहनांची पाहणी करून या अकरा वाहनांवर सोळा लाख रु पयांचा दंड आकारला.
महसूल यंत्रणेची चुप्पी...
सटाणा-ताहाराबाद रोडने राजरोस वाळूची तस्करी सुरू असताना तिला रोखण्यासाठी पोलीस यंत्रणेने प्रामाणिकपणे आपले कर्तव्य बजावले; मात्र या कारवाईसाठी पोलिसांनी महसूल यंत्रणेकडे मदत मागितली असता त्यांनी पथक देण्यास साफ नकार देऊन एकप्रकारे कारवाई करण्यास असमर्थताच दर्शविली. महसूलच्या या भूमिकेमुळे यंत्रणा अधिकच संशयाच्या भोवऱ्यात सापडली.
डंपर पकडल्यानंतर आरटीओने तत्काळ दुसऱ्या दिवशीच सोळा लाख रुपये आपल्या तिजोरीत भरून घेतले. मात्र पाच दिवस उलटूनही महसूल यंत्रणा कारवाईबाबत चुप्पी साधून असल्यामुळे उलटसुलट चर्चेला उधाण आले आहे. एकीकडे सटाण्याचे तहसीलदार मालेगाव महापालिकेच्या इलेक्शन ड्यूटीवर असताना, दुसरीकडे सटाण्यातील छोट्यामोठ्या वाळू तस्करांना रात्रंदिवस सावलीसारखे आपल्या सोबत घेऊन फिरणारे त्यांचे सहकारी अधिकारी मात्र कारवाई करण्याऐवजी दोन दोन वेळा विविध अ‍ॅँगलने डंपरचे फोटो काढून काय साध्य करताहेत हे त्यांनाच ठाऊक. एकंदरीत वाळूचे डंपर पकडून पाच दिवस उलटले तरी अद्याप महसूल यंत्रणेने कोणतीही कारवाई न केल्यामुळे यंत्रणा संशयाच्या भोवऱ्यात सापडली आहे.
वाळू तस्करांविरु द्ध
सर्वात मोठी कारवाई
सटाणा पोलिसांच्या इतिहासात वाळूमाफियांविरुद्ध ही सर्वात मोठी कारवाई करण्यात आली आहे. या कारवाईमुळे आरटीओ यंत्रणादेखील हादरली आहे. मालेगावचे सहायक प्रादेशिक परिवहन अधिकारी नानासाहेब बच्छाव यांनी प्रत्यक्ष सटाणा येथे भेट देऊन डंपरची पाहणी केली. त्यानंतर सोळा लाख रु पये दंड भरण्याचे आदेश दिले. दरम्यान, स्वामित्वहक्काची पावती नसलेले व पावतीपेक्षा अधिक वाळू भरून तस्करी केल्याचे पोलिसांना आढळून आले आहे.
महसूल विभागाने कायदेशीर कारवाई केल्यास सत्तावीस लाख
रु पये दंड वसुलीस पात्र राहतील, असे एका महसूल विभागाच्या वरिष्ठ अधिकाऱ्याने सांगितले. त्यामुळे
महसूल आणि आरटीओ या दोन्ही विभाग मिळून ४३ लाख रु पये दंड शासनच्या तिजोरीत पडणार आहे. त्यामुळे सटाणा पोलीस ठाण्याच्या इतिहासात सर्वात मोठी कारवाई मानली जाणार आहे.