नाशिकमध्ये प्राणवायुच्या गळतीने घेतले २२ प्राण!

नाशिक : शहरातील महापालिकेच्या डॉ. झाकीर हुसेन कोविड रुग्णालयात बुधवारी (दि.२१) दुपारी ऑक्सिजन टाकीला लागलेल्या गळतीमुळे प्राणवायू पुरवठा खंडित होऊन तब्बल २२ रुग्णांचा मृत्यू झाला आहे. मृतात बारा पुरूष आणि दहा महिलांचा समावेश असून या दुर्घटनेने संपूर्ण राज्य हादरले आहे. एकीकडे ऑक्सिजन अभावी नाशिकच नव्हे तर राज्यभरात रुग्णालयांत बेड मिळत नसताना दुसरीकडे मात्र उपलब्ध ऑक्सिजनची गळती होऊन रूग्णांवर जीव गमावण्याची वेळ आल्याने व्यवस्थेचा गलथान कारभार समोर आला आहे.

दरम्यान, या घटनेच्या उच्चस्तरीय चाैकशीचे आदेश मुख्यमंत्री उध्दव ठाकरे यांनी दिले असून चौकशीत दोषी आढळणाऱ्यांची गय केली जाणार नाही, असे स्पष्ट केले आहे. याशिवाय मृतांच्या नातेवाईकांना प्रत्येकी पाच लाख रूपयांची मदत राज्य शासनाने जाहीर केली आहे तर नाशिक महापालिकेनेही पाच लाख रूपयांची मदत देणार असल्याचे स्पष्ट केले आहे.

नाशिक शहरातील द्वारका चौकानजीक असलेल्या महापालिकेच्या डॉ. झाकीर हुसेन रुग्णालयात एकूण १५७ बेडची क्षमता असून, हे रुग्णालय पूर्ण क्षमतेने रुग्णांनी भरलेले आहे. त्यात १३१ रुग्ण ऑक्सिजन आणि १५ रुग्ण व्हेंटिलेटवर होते. त्यातील ६३ रूग्ण गंभीर होते. रूग्णालयात महिनाभरापूर्वीच ऑक्सिजन टाकी बसविण्यात आली आहे. सदर टाकी ऑक्सीजनने भरताना नोझल तुटल्याने दुपारी १२ वाजेच्या सुमारास ही गळती सुरू झाली आणि रूग्णालयातील कर्मचाऱ्यांची एकच धावपळ उडाली. त्यांनी तातडीने अग्निशमन दलाला पाचारण केले. तोपर्यंत रुग्णांचे प्राण कंठाशी आले होते. महापालिकेच्या वैद्यकीय विभागाचे तंत्रज्ञ आणि पथक तातडीने घटनास्थळी पोहोचले. त्याचवेळी रुग्णांचे नातेवाईकही कोविड कक्षात धावले. डॉक्टर्स, कर्मचारी आणि नातेवाइकांनी छातीवर दाब देऊन रुग्णांना पंपिंग करून वाचवण्याचा प्रयत्न केला. परंतु अनेक रूग्ण अगदी नातेवाईंकासमोर दगावले. या रूग्णालयाच्या तळमजल्यावर काही ऑक्सिजन सिलिंडर असल्याचे कळल्यावर कर्मचारी व नातेवाईक ते घेऊन कक्षात धावले. दरम्यानच्या काळात दुर्घटनेची माहिती कळताच जिल्हा शासकीय रूग्णालयाकडून तातडीने पंधरा जम्बो सिलिंडर या रूग्णालयात पाठवण्यात आले. मात्र त्यानंतरही ऑक्सिजनचा पुरेशा प्रमाणात पुरवठा न झाल्याने या धावपळीत २२ रुग्णांचा मृत्यू झाला. त्यात ११ पुरुष आणि ११ महिलांचा समावेश आहे.

इन्फो...

पाच रुग्णांना वाचवण्यात यश

रूग्णालयातील या दुर्घटनेनंतर प्रत्येक जण आपल्या रूग्णाला वाचवण्यासाठी धावपळ करू लागला. महापालिकेने गंभीर रूग्ण तातडीने हलवण्याची तयारी केली आणि येथील पाच रूग्ण अन्यत्र स्थलांतरित केल्याने ते मात्र बचावले. यातील चार रूग्णांना महापालिकेच्या बिटको रूग्णालयात तर एकाला समर्थ हॉस्पिटलमध्ये दाखल करण्यात आले. त्यामुळे या धावपळीतही पाच जणांचे प्राण वाचवण्यात यंत्रणेला यश आले.

इन्फो...

वेपोरायझरकडे जाणाऱ्या पाईपला गळती

ऑक्सिजन टाकीची् गळती कशी झाली असा प्रश्न या दुर्घटनेनंतर केला जात असून, नाशिक महापालिकेचे आयुक्त कैलास जाधव यांनी दिलेल्या माहितीनुसार टाकीतून वेपोरायझरमध्ये द्रवरूप ऑक्सिजन पाठवण्यासाठी असलेल्या पाईपलाईनला गळती लागली. त्यामुळे ही दुर्घटना घडल्याचे सकृतदर्शनी आढळल्याचे सांगितले. या दुर्घटनेनंतर नाशिक महापालिकेने तातडीने शहरात ऑक्सिजन पुरवठा करणाऱ्या संबंधित कंपनीच्या तंत्रज्ञांना पाचारण केले. त्यांनी तातडीने त्याठिकाणी वेल्डींग करून गळती थांबवली. पण तोपर्यंत २२ रुग्णांनी प्राण गमावले होते.

इन्फो...

नेत्यांच्या भेटी

दुर्घटनेनंतर सर्व प्रथम जिल्ह्याचे पालकमंत्री छगन भुजबळ व नाशिकचे महापौर सतीश कुलकर्णी यांच्यासह वरिष्ठाधिकाऱ्यांनी भेट दिली. त्यानंतर आरोग्यमंत्री राजेश टोपे, महसूल मंत्री बाळासाहेब थोरात, अन्न व औषध प्रशासन मंत्री राजेंद्र शिंगणे, कृषीमंत्री दादा भुसे, विधानसभेचे प्रभारी अध्यक्ष नरहरी झिरवाळ, विधान परिषदेचे विरोधी पक्ष नेते प्रवीण दरेकर यांनीही घटनास्थळी भेट देऊन माहिती घेतली.

दुर्घटनेतील मृतांची नावे अशी...

१) पंढरीनाथ नेरकर (३७),

२) भैय्या सांडुभाई सय्यद (४५)

३) अमरदीप नगराळे (७४)

४) भारती निकम (४४)

५) श्रावण पाटील (६७)

६) मोहना खैरनार (६०

७) मंशी शहा (३६)

८) सुनील झाल्टे (३३)

९) सलमा शेख (५९)

१०)आशा शर्मा (४५)

११) प्रमोद वालुकर (४५)

१२) प्रवीण महाले (३४)

१३) सुगंधाबाई थोरात (६५)

१४) हरणाबाई त्रिभुवन (६५)

१५) रजनी काळे (६१),

१६) गिता वाघचौरे (५०)

१७) बापुसाहेब घोटेकर (६१)

१८) वत्सलाबाई सुर्यवंशी (७०)

१९) नारायण इरनक (७३)

२०) संदीप लोखंडे (३७)

२१) बुधा गोतरणे (६९)

२२) वैशाली राऊत (४६)