नाशिकमध्ये ६७ हजार शेतकऱ्यांना बसला अवकाळी पावसाचा फटका

३० हजार हेक्टर कांदापिकाचा चिखल

अझहर शेख, नाशिक: जिल्ह्याला ७ ते १७ एप्रिल या कालावधीत वादळी गडगडाटी अवकाळी पाऊस व गारपिटीने जोरदार तडाखा दिला. यामुळे पंधरा तालुक्यांमधील ७८० गावे बाधित झाली आहेत. सुमारे ६६ हजार ९२३ शेतकऱ्यांच्या शेतपिकांची मोठी हानी झाली आहे. मागील महिनाभरापासून अवकाळी पावसाचा सामना जिल्ह्यातील शेतकऱ्यांना करावा लागत आहे. यामुळे बळीराजा हवालदिल झाला आहे.

नाशिक शहरासह जिल्ह्यातील सर्वच तालुक्यांमध्ये मागील दोन आठवड्यांमध्ये अवकाळी पावसाने जोरदार हजेरी लावली. यामुळे शेतपिकाचे प्रचंड नुकसान झाले. शेतकऱ्यांना मोठा आर्थिक फटका बसला आहे. वादळी पावसासह गारपीटही झाल्यामुळे नुकसानीमध्ये अधिकच भर पडली. एप्रिल महिन्यात कडक उन्हाळा असतो. मात्र, या वर्षी अवकाळी पावसाने दोन आठवडे हजेरी लावली. यामुळे जिल्ह्यातील शेतकऱ्यांच्या तोंडाशी आलेला घास हिरावला आहे.

मागील ४५ दिवसांत जिल्ह्यात ४१ मिमी इतका अवकाळी पाऊस झाल्याची नोंद करण्यात आली. या कालावधीत जिल्ह्यातील सर्व १५ तालुक्यांमध्ये पाऊस झाला. त्यामुळे ३७ हजार ९८१ हेक्टरवरील पिकांची हानी झाली आहे. यामध्ये ३० हजार २५६ हेक्टर क्षेत्रावरील कांदापिकाचा अक्षरक्ष: चिखल झाला. याशिवाय २ हजार ६४५ हेक्टरवरील द्राक्षबागाही उद्ध्वस्त झाल्या आहेत. १ हजार ७१५ हेक्टरवरील पालेभाज्या, फळभाज्या पिकाचेही नुकसान झाले आहे. सर्वाधिक नुकसान सटाणा-बागलाण तालुक्यात झाले असून, तेथील २३ हजार ४२२ हेक्टरवरील शेतपिकांची अवकाळी पावसामुळे नासाडी झाल्याचा कृषी विभागाचा प्राथमिक अंदाज आहे. याच तालुक्यातील १५२ गावांमधील ३४ हजार ६४५ शेतकऱ्यांना अवकाळी पावसामुळे नुकसानीचा सामना करावा लागला आहे.

तालुकानिहाय शेतीचे नुकसान (हेक्टरी)

तालुका -- गावे---- बाधित शेतकरी --------- क्षेत्र

• सटाणा- १५२---- ३४,६४५ ------------- २३,४२२
• मालेगाव - ४४------- १,४६६ ------------- ००,९१५
• नांदगाव - ५७---------१२,७५२ ------------- ५,४४४
• कळवण- ४३ ---------१,६३४ ----------------०,७२४
• देवळा - ०७-----------६३४ ---------------- ०३५५
• दिंडोरी- ११३------- ३,०६५ ---------------- १,८६६
• सुरगाणा- १०६-----------२,१४८ -----------------०,५६८
• नाशिक- ५३------------- १,१७५ ----------------०,५९७
• त्र्यंबकेश्वर- १३ ------------- ७७ -----------------०,०१८
• पेठ---- २३-------------- ३५६ -----------------०२१४
• इगतपुरी - २३---------- १,९६९------ -------०,५४४
• निफाड- ८०------------- ३,०२६ --------------- १,५४६
• सिन्नर- २६---------------६३७ ------------------०,३७७
• चांदवड- २५------------ ३,१७९ ---------------- १,२९४
• येवला - १५-------------- १६० ------------------०,०९२
• एकूण - ७८०             ६६,९२३ -------------- ३७,९८१

शेतपिकांचे नुकसान (हेक्टरी)

• कांदा - ३०,२५६
• द्राक्षे - २,६४५
• भाजीपाला - १,७१५
• डाळिंब - ९९७
• गहू - ७२३
• आंबा - ५००
• मका - ३८०
• टोमॅटो - ३२६
• बाजरी - २२६