इन्स्टाग्रामवरून ओळख, लग्नाचे आमीष दाखवत डॉक्टर महिलेवर नाशकात बलात्कार

पीडित फिर्यादी महिला व संशयित संदीप यांच्यामध्ये जानेवारी महिन्यात इन्स्टाग्रामद्वारे ओळख झाली.

नाशिक : इन्स्टाग्रामवरून ओळख करत वेळोवेळी संपर्कात राहून मैत्री व प्रेमाचा बनाव केला अन् लग्नाचे आमीष दाखवून बळजबरीने शरिरसंबंध ठेवत अत्याचार केल्याची धक्कादायक घटना उघडकीस आली आहे. याप्रकरणी पिडित डॉक्टर महिलेने इंदिरानगर पोलिस ठाण्यात धाव घेत आपबिती सांगितल्यानंतर पोलिसांनी पिडितेच्या फिर्यादीनुसार भाजपचे माजी नगरसेवक भगवान दोंदे यांचा मुलगा संशयित संदीप भगवान दोंदे यांच्यावर बलात्काराचा गुन्हा दाखल केला आहे.

पीडित फिर्यादी महिला व संशयित संदीप यांच्यामध्ये जानेवारी महिन्यात इन्स्टाग्रामद्वारे ओळख झाली. या ओळखीचे रूपांतर पुढे मैत्रीत अन् प्रेमात झाले. त्यानंतर संशयित हा पिडितेला भेटण्यासाठी भेटण्यासाठी तिच्या घरी ये-जा करू लागला. यावेळी ‘माझे तुझ्यावर खुप प्रेम आहे, आपण विवाह करू...’ असे सांगून विश्वास संपादन केला. यानंतर पिडितेने त्यास आई-वडिलांना त्यांच्या नात्याची माहिती देण्यास सांगितले. दरम्यान, संशयित संदीप याने एकेदिवशी पिडितेच्या घरी येऊन तिच्याशी जवळीक साधून बळजबरीने शरिरसंबंध प्रस्थापित केले.

यावेळी पिडितेने त्यास विरोध दर्शवित ‘आपले लग्न अजून झालेले नाही, शरीरसंबंध ठेवू नको...’ असा आक्षेप घेतला. यावेळी संशयिताने आपण लग्न करणारच आहोत, काहीही होत नाही, असे सांगुन शरिरसंबंध ठेवले. यामुळे ऑगस्ट महिन्यात पिडितीला गर्भवती असल्याचे तिच्या लक्षात आले. तिने तातडीने याबाबत संशयिताला कल्पना दिली असता त्याने ‘सध्या आपल्याला बाळ ठेवता येणार नाही...’ असे सांगून गर्भपाताच्या गोळ्या आणून देत त्या सेवन करण्यास सांगितले. यामुळे गर्भपात झाल्याचे पिडितेने फिर्यादीत म्हटले आहे.

त्यानंतर पुन्हा असाच प्रकार संशयिताने शरिरसंबंध केल्याने घडला अन् पिडिता चार महिन्यांची दुसऱ्यांदा गर्भवती झाल्याचे ऑक्टोबरमध्ये लक्षात आले. यानंतर तिने पुन्हा संशयितास सांगितले असता, त्याने ‘तुझ्याशी माझा काही संबंध नाही, मी तुला लग्नाचे आश्वासन दिलेले नाही सांगून तुझे परिसरात राहणे अवघड करू अशाप्रकारे दम भरला, असे फिर्यादीत म्हटले आहे. पोलिसांनी संशयित संदीपविरूद्ध बलात्कारासह गर्भपातास भाग पाडल्याप्रकरणी गुन्हा दाखल केला आहे. याप्रकरणी अधिक तपास महिला पोलीस उपनिरिक्षक मनीषा शिंदे करीत आहेत.