मनमाडच्या चौघा युवकांचा अपघाती मृत्यू

इंदूर- पुणे राज्य महामार्गावरील मनमाडजवळ अनकवाडे शिवारात शेजवळ पॉलिटेक्निक कॉलेजजवळ बुधवारी मध्यरात्रीनंतर १ वाजेच्या सुमारास भरधाव वेगात असलेल्या चारचाकी गाडीने झाडाला धडक दिल्याने शहरातील चौघांचा जागीच मृत्यू झाला, तर एक जण गंभीर जखमी झाल्याची घटना घडली. शहरातील एकाच वेळी चार युवकांचा अपघाती मृत्यू झाल्याने मनमाडकर हळहळले. बुधवारी (दि.११) दुपारी या युवकांवर शोकाकुल वातावरणात अंत्यसंस्कार करण्यात आले.

ठळक मुद्देएक गंभीर जखमी : अनकवाडे शिवारात झाडावर आदळली कार

नाशिक : इंदूर- पुणे राज्य महामार्गावरील मनमाडजवळ अनकवाडे शिवारात शेजवळ पॉलिटेक्निक कॉलेजजवळ बुधवारी मध्यरात्रीनंतर १ वाजेच्या सुमारास भरधाव वेगात असलेल्या चारचाकी गाडीने झाडाला धडक दिल्याने शहरातील चौघांचा जागीच मृत्यू झाला, तर एक जण गंभीर जखमी झाल्याची घटना घडली. शहरातील एकाच वेळी चार युवकांचा अपघातीमृत्यू झाल्याने मनमाडकर हळहळले. बुधवारी (दि.११) दुपारी या युवकांवर शोकाकुल वातावरणात अंत्यसंस्कार करण्यात आले.

 

बुधवारी मध्यरात्री एक वाजेच्या सुमारास येवल्याकडून मनमाडकडे कार (क्रमाक एमएच ४१ व्ही ७३१७) येत असताना अनकवाडे शिवारातील शेजवळ पॉलिटेक्निक कॉलेजसमोर भरधाव वेगात झाडावर आदळल्याने अपघात होऊन मनमाड शहरातील चार युवकांचा जागीच मृत्यू झाला, तर एका युवकाच्या हाता-पायाला आणि डोक्याला गंभीर दुखापत झाल्याने त्याला पुढील उपचारासाठी मालेगाव येथील खाजगी रुग्णालयात दाखल करण्यात आले आहे. या अपघातामध्ये तौफिक गफार शेख (२५), प्रवीण राजू सकट (२३), दिनेश राजेंद्र भालेराव (३२), हे तिघे रा. एच.के. हायस्कूलच्या पाठीमागे, पाटील नगर, मनमाड आणि गोकुळ वाल्मीक हिरे (३८), रा. गौतमनगर, मनमाड यांचा दुर्दैवी अंत झाला, तर अजय संतोष वानखेडे (२३), रा. सिद्धार्थ कॉलनी, मनमाड हा या अपघातामध्ये गंभीर जखमी झालेला आहे. अपघाताची खबर गावात वाऱ्यासारखी पसरताच हितचिंतकांसह मित्र परिवाराने येथील उपजिल्हा रुग्णालयात एकच गर्दी केली. बुधवारी दुपारी या युवकांवर शोकाकुल वातावरणात अंत्यसंस्कार करण्यात आले. मनमाड- येवला रोडवरील फौजी ढाब्यावर रात्रीच्या सुमारास जेवण करून येत असताना हा अपघात घडल्याची शहरात चर्चा आहे.

 

इन्फो

 

शहरातील चार होतकरू युवकांचा अपघाती मृत्यू झाल्याने शहरावर शोककळा पसरली. दरम्यान, दिनेश भालेराव हा मंडप व केटरिंगमध्ये काम करत होता, तर प्रवीण सकट हा मोबाइल रिपेअरिंग सेंटरमध्ये काम करत होता. तौफिक शेख हा सरबत दुकान लावत होता, तर गोकुळ हिरे हा वाहन चालक होता. जखमी अजय वानखेडे केटरिंगचे काम करतो. यामध्ये दिनेश भालेराव, प्रवीण सकट व गोकुळ हिरे हे तिघे विवाहित आहेत.