आगासखिंडला बिबट्याचा दुचाकीस्वारावर हल्ला

आगासखिंड येथील प्रगत ॲग्रोचे संचालक प्रताप विठोबा जाधव (२८) हे बुधवारी (दि.२१) रात्री दहा वाजेच्या सुमारास कडवा कालव्याच्या रस्त्याने दुचाकीने आपल्या घराकडे जात असताना कालव्यालगत दबा धरून बसलेल्या बिबट्याने अचानक दुचाकी चालवत असलेल्या प्रताप जाधव यांच्यावर झडप घातली. जाधव यांचा तोल जाऊन ते खाली पडले. बिबट्याच्या पायाच्या पंजाने जाधव यांच्या डाव्या हातावर गंभीर जखमा झाल्या. प्रताप जाधव यांनी आरडाओरड केल्याने चवताळलेल्या बिबट्याने अंधारात धूम ठोकली. जखमी जाधव यांना अशोक जाधव, तानाजी जाधव, ओमकार जाधव व वनविभागाचे सद‌्गीर यांनी नाशिक रोड येथील बिटको रुग्णालयात उपचारासाठी हलविले. तिथे डॉक्टरांनी त्यांच्यावर औषधोपचार करून त्यांना घरी सोडले. वनविभागाने या घटनेची दखल घेतली असून नागरिकांना सतर्कतेचे आवाहन केले आहे. दरम्यान,बेलू-आगासखिंड परिसरात दुचाकींवर हल्ला करणाऱ्या व पिंजऱ्यात जेरबंद न होणाऱ्या बिबट्याचा वनविभागाने दुसऱ्या पद्धतीने बंदोबस्त करावा, अशी मागणी आगासखिंडचे सरपंच शिवाजी आरोटे, माजी सरपंच दत्तू आरोटे, उपसरपंच लहानू बरकले, बेलूचे सरपंच प्रकाश तुपे, संजु तुपे, अंकुश तुपे आदींनी केली आहे.

इन्फो

पिंजऱ्याजवळच हल्ला

बेलू - आगासखिंड परिसरात बिबट्याचे दुचाकींवर सातत्याने हल्ले सुरूच आहे. गेल्या हप्त्यात बिबट्याने याच ठिकाणी दुचाकीवर झडप घालत ओमकार बरकले व अक्षय बरकले यांना गंभीर जखमी केले होते. बिबट्याच्या या हल्ल्यानंतर वनविभागाने येथे पिंजरा लावलेला आहे. विशेष म्हणजे या पिंजऱ्यापासून हाकेच्या अंतरावरच बिबट्याने प्रताप जाधव यांच्या दुचाकीवर हल्ला करून त्यांना जखमी केले. यामुळे बिबट्या पिंजऱ्यात जेरबंद होण्याची शक्यता धूसरच आहे.

फोटो - २३प्रताप जाधव

आगासखिंड शिवारात बिबट्याच्या हल्ल्यात जखमी युवक शेतकरी.

===Photopath===

230421\23nsk_8_23042021_13.jpg

===Caption===

फोटो - २३प्रताप जाधव आगासखिंड शिवारात बिबट्याच्या हल्ल्यात जखमी  युवक शेतकरी.