मद्यपी पतीचा जाच, पत्नीने काढला काटा; मायलेकाला अटक

न्यायडोंगरीतील घटना

किशोर मोरे, न्यायडोंगरी (नाशिक): दारू पिऊन मारहाण करत असल्याच्या रागातून पत्नीनेच आपल्या अल्पवयीन मुलाच्या साहाय्याने पतीचा गळा आवळून खून करत काटा काढल्याची घटना येथील वृंदावन नगरात गुरूवारी (दि.५) रात्री ११ वाजेच्या सुमारास घडली.

पोलिस सूत्रांनी दिलेल्या माहितीनुसार, न्यायडोंगरी येथील वृंदावन नगर, त्रिमूर्ती पेट्रोलपंपासमोर राहणाऱ्या मीराबाई ममराज राठोड यांनी याप्रकरणी फिर्याद दिली आहे. त्यात म्हटले आहे, उषा संजय गायकवाड व त्यांचा अल्पवयीन मुलगा या पती संजय गणेश गायकवाड (३३) याच्यासोबत वृंदावननगर येथे वास्तव्याला आहेत. ऊसतोड कामगार असलेल्या संजय गायकवाड हा रात्रीच्या सुमारास दारू पिवून मारहाण करत असल्याचा राग येऊन उषा गायकवाड हिने पती संजयच्या डोळ्यात मिरचीची पूड टाकली तर तिच्या अल्पवयीन मुलाने नायलॉन दोरीच्या सहाय्याने संजय याचा गळा दाबल्याने त्याचा मृत्यू झाला.

याबाबतची फिर्याद मयत संजय याची आई मीराबाई ममराज राठोड यांनी नांदगाव पोलिस ठाण्यात दिली. त्यानुसार मायलेकाविरूद्ध खुनाचा गुन्हा दाखल करण्यात आला आहे. अधिक तपास मनमाडचे उपविभागीय पोलीस अधिकारी सोहेल शेख , नांदगावचे पोलीस निरीक्षक प्रीतम चौधरी यांच्या मार्गदर्शनाखाली पोलीस उपनिरीक्षक मनोज वाघमारे हे करीत आहेत.

मुलगा बालसुधारगृहात

 नांदगाव पोलिसांनी तातडीने तपासाची चक्रे फिरवीत दोन्ही आरोपींना अटक केली आहे. त्यात मुलगा अल्पवयीन असल्याने त्याची बाल सुधारगृहात रवानगी करण्यात आल्याची माहिती पोलीस सूत्रांनी दिली आहे.