देहरेवाडीच्या जंगलात मुलीला फासावर लटकविण्याचा प्रयत्न

दिंडोरी तालुक्यातील देहरेवाडी येथील जंगलात ६ वर्षांच्या अनोळखी चिमुरडीला फासावर लटकवून मारण्याच्या प्रयत्न केल्याची खळबळजनक घटना उघडकीस आली आहे. सदर मुलीवर जिल्हा रुग्णालयात उपचार सुरू असून, तिची प्रकृती चिंताजनक आहे.

ठळक मुद्देमुलीची प्रकृती चिंताजनक : पोलिसात गुन्हा दाखल

दिंडोरी : तालुक्यातील देहरेवाडी येथील जंगलात ६ वर्षांच्या अनोळखी चिमुरडीला फासावर लटकवून मारण्याच्या प्रयत्न केल्याची खळबळजनक घटना उघडकीस आली आहे. सदर मुलीवर जिल्हा रुग्णालयात उपचार सुरू असून, तिची प्रकृती चिंताजनक आहे.

याबाबत पोलीस सूत्रांनी दिलेल्या माहितीनुसार, शुक्रवारी (दि.७) दुपारी १२ वाजण्याच्या सुमारास देहरेवाडी येथील गुराखी नारायण गांगुर्डे हे आपले नेहमीप्रमाणे जनावरे चारत असताना, जंगलात काहीतरी आवाज व झटापट होत असल्याची जाणीव झाली. त्यांनी जंगली जनावरे असावीत, असा अंदाज करून त्या दिशेने पाहणी केली असता, एक इसम मुलीला फासावर लटकवत असल्याचे दिसून आले. गांगुर्डे यांनी त्याला पकडण्याचा प्रयत्न केला असता, दाट झाडे-झुडपांचा फायदा घेत तो पसार झाला. सदर घटना त्यांनी रवळगावचे पोलीस पाटील साहेबराव साळवे यांना कळविली. त्यांनी दिंडोरी पोलिसांना खबर दिली. पोलिसांनी सदर मुलीला तत्काळ नाशिक जिल्हा रुग्णालयात दाखल केले. मुलीची ओळख अद्याप पटलेली नाही. पोलीस निरीक्षक प्रमोद वाघ यांनी घटनास्थळी पाहणी करून, अज्ञात इसमाच्या विरोधात गुन्हा दाखल केला आहे. मुलीच्या अंगात पिवळ्या गर्द रंगाचा फ्रॉक, पायात काळे बूट व नाकात तांब्याच्या धातूची मोरणी घातली आहे. रात्री उशिरापर्यंत मुलीची ओळख पटू शकली नव्हती. पुढील तपास दिंडोरी पोलीस करत आहेत.

 

फोटो- ०७ दिंडोरी गर्ल