धक्कादायक! पोलीस ठाण्यातच अल्पवयीन प्रेमवीराचा आत्महत्येचा प्रयत्न

येवला तालुक्यातील भिंगारे येथील अल्पवयीन तरुणाचे एका युवतीवर प्रेम होते. मात्र, युवतीच्या घरच्यांचा युवक अल्पवयीन असल्याने प्रेम प्रकरणाला विरोध होता. युवती लासलगाव पोलीस कार्यालयाच्या हद्दीत राहत असल्याने येथील पोलीस कार्यालयात यासंदर्भात युवती हरवल्याची तक्रार देण्यात आली होती. याच कारणाने शनिवारी (दि. ५) सकाळी १० वाजेच्या दरम्यान या युवकाने पोलीस कार्यालयाच्या आवारात प्रवेश करत जवळच असलेल्या दत्त मंदिर शेजारी जाऊन विषारी औषध पिऊन आत्महत्या करण्याचा प्रयत्न केला.

आवारात उभे असलेले पोलीस नाईक संदीप शिंदे व होमगार्ड यांच्या लक्षात ही घटना येताच, या युवकाला तातडीने औषधोपचारासाठी ग्रामीण रुग्णालय लासलगाव येथे नेण्यात आले. तेथे प्राथमिक उपचार करून पुढील उपचारासाठी शासकीय जिल्हा रुग्णालयात नाशिक येथे पाठविण्यात आले. त्यावर उपचार सुरू असून, त्याची प्रकृती धोक्याबाहेर आहे. लासलगाव पोलीस कार्यालयाचे सहायक पोलीस निरीक्षक राहुल वाघ यांच्या मार्गदर्शनाखाली पोलीस उपनिरीक्षक आदिनाथ कोठुळे व पोलीस तपास करीत आहेत.