आदिवासी बांधवांना शासकीय अनुदानापासून वंचित ठेवण्याचा प्रयत्न

नांदूरशिंगोटे : सिन्नर तालुक्यातील नांदूरशिंगोटे ग्रामपंचायतीत गेल्या महिनाभरापासून गाजत असलेल्या स्वच्छ भारत सर्वेक्षण प्रकरणात आदिवासी बांधवांच्या शिष्टमंडळाने अनुसूचित जमाती कल्याण समितीचे प्रमुख आमदार दौलत दरोडा यांची भेट घेत न्याय मिळवून देण्याची मागणी केली. याप्रकरणी आमदार दरोडा यांनी आपण प्रत्यक्ष लक्ष घालून चौकशी करून संबंधितांवर कारवाई करण्याचे आश्वासन शिष्टमंडळाला दिले. अनुसूचित जमाती कल्याण समिती नाशिक जिल्ह्याच्या दौऱ्यावर आली असून, आदिवासी समाजाचे नेते तुकाराम मेंगाळ व माजी उपसरपंच बस्तीराम आगिवले यांच्या नेतृत्वाखाली शिष्टमंडळाने आमदार दौलत दरोडा यांची भेट घेत आपले गाऱ्हाणे मांडले. नांदूरशिंगोटे येथील ग्रामपंचायतीचे ग्रामविकास अधिकारी, सरपंच व अन्य पदाधिकारी यांनी जाणूनबुजून आपल्या पदाचा दुरूपयोग करत खोटी व बनावट माहिती प्रशासनास सादर केली आहे. वरिष्ठ अधिकाऱ्यांकडून संबंधित ग्रामसेवक, सरपंच व इतर पदाधिकारी यांच्यावरती आठ दिवसांच्या आत कार्यवाही करण्यात येईल, असे आश्वासन देण्यात आले होते. परंतु आजतागायत त्यांच्यावर कुठल्याही प्रकारची कार्यवाही झालेली नाही. या फसवणुकीच्या प्रकरणातील ग्रामसेवक, सरपंच व इतर पदाधिकारी यांच्यावर योग्य ती कार्यवाही करून यांची पदे बरखास्त करण्यात यावी व सर्व आदिवासी समाजाला न्याय मिळवून द्यावा, अशी मागणी निवेदनात करण्यात आली आहे. यावेळी सह्याद्री मंडळाचे तालुकाध्यक्ष अजय कडाळे, संघर्ष ग्रुपचे संदीप शेळके, गंगाराम मेंगाळ, निवृत्ती डोके, मनोहर आगिवले, राजेंद्र पथवे, शिवाजी आगिवले, भास्कर मेंगाळ, रामनाथ गिऱ्हे, भीमा गिऱ्हे, पांडुरंग आगिवले, कुंडलिक मेंगाळ आदिवासी समाजाचे कार्यकर्ते उपस्थित होते.

--------

अहवालाची प्रक्रिया पूर्ण

जाणीवपूर्वक आदिवासी बांधव व इतर नागरिकांना शासकीय अनुदानापासून वंचित ठेवण्याचा प्रयत्न केला आहे. त्यासंदर्भात ग्रामपंचायत कार्यालयाकडील प्रोसिडिंगवरील विषय क्र. ९ ठराव क्र. ८२ मधील खोटी व बनावट माहिती वरिष्ठ प्रशासनाच्या निदर्शनास आणून दिली आहे. त्या संदर्भात जिवंत लोक मृत दाखविले आहेत, ज्या व्यक्ती कायमस्वरूपी स्थानिक रहिवासी आहेत, त्यांना स्थलांतरित दाखविले व ज्या व्यक्ती भूमिहीन किंवा अल्पभूधारक आहेत, त्यांच्या नावे अधिक क्षेत्र दाखविण्यात आले असल्याचा आरोप आदिवासी बांधवांनी निवेदनात केला आहे. याबाबत पंचायत समिती स्तरावरून चौकशी करून त्यांचे जबाबही प्रशासनास प्राप्त झाले आहेत. संपूर्ण अहवालाची प्रक्रिया पूर्ण झाली आहे.

(२३ निवेदन) आमदार दौलत दरोडा यांना मागण्यांचे निवेदन देताना तुकाराम मेंगाळ, बस्तीराम आगिवले आदी.

230821\130723nsk_22_23082021_13.jpg

आमदार दौलत दरोडा यांना मागण्यांचे निवेदन देतांना तुकाराम मेंगाळ, बस्तीराम आगिवले आदी.