अंतर्गत वादातून एकास मारहाण

वणी : कौटुंबिक वाद मिटविण्यासाठी गेलेल्या तिघांनी वाद घालून फायटरने मारहाण करून जीवे मारण्याची धमकी दिल्याने चिंचखेडच्या तिघांविरोधात गुन्हा दाखल करण्यात आला आहे. अनिल दौलत पवार रा.चिंचखेड यांचा भावकीतील वाद होता. तो वाद आपसात मिटला होता. दरम्यान रायबा तानाजी पाटील, योगेश माधव पवार, अमोल बाळू पवार हे अनिल यांच्याकडे आले व कौटुंबिक वाद मिटवून घ्या असे म्हणाले. याबाबत अनिलने सांगितले की आमचा वाद मिटला आहे. तुम्ही कशासाठी आलात? यावरून अनिल व तिघांचा वाद झाला. व त्या वादातून अनिल यांना तिघांनी संगनमताने फायटरने मारहाण करून जीवे मारण्याची धमकी दिल्याचे फिर्यादित म्हटले आहे. यावरून तीन संशयिताविरोधात गुन्हा दाखल करण्यात आला आहे.

---------------------------

अपघाती दुचाकीचालकाचा पाच दिवसांनी मृत्यू

वणी : धोडंबे रस्त्यावर मुळाणे फाट्यावर दुचाकीवरील नियंत्रण सुटून झालेल्या अपघातात जखमी झालेल्या दुचाकीचालकाचा पाच दिवसांनी नाशिकच्या खासगी रुग्णालयात मृत्यू झाला. जगन दिनकर भोये रा. पारेगाव, ता. चांदवड हे दिनांक २४ जून रोजी दुचाकीवरून वणी-धोडंबा रस्त्यावरून जात असताना दुचाकीवरील नियंत्रण सुटले. यात ते गंभीर जखमी झाले. त्यांना उपचारासाठी नाशिकला दाखल करण्यात आले होते. उपचारादरम्यान पाच दिवसानंतर त्यांचा मृत्यू झाला.