स्वागतासाठी इच्छुकांची चढाओढ

संधी : राजकीय पक्षांच्या स्वागत कमानी

 नाशिक : महापालिका निवडणुकीच्या तोंडावर आलेल्या गणेशोत्सवाची संधी साधून इच्छुकांनी विसर्जन मिरवणुकीत गणेश मंडळांचे स्वागत करताना आपली राजकीय पोळीही भाजून घेतली आहे. ज्या ज्या मार्गावरून गणेश विसर्जन मिरवणूक जाणार होती, त्या ठिकाणी सर्वच राजकीय पक्षांच्या इच्छुकांनी स्वागत कमानी त्यासाठी उभारल्या होत्या.
महापालिका निवडणुकीच्या पार्श्वभूमीवर यंदा गणेशोत्सव आल्यामुळे साहजिकच या निवडणुकीसाठी इच्छुक असलेल्यांनी निवडणुकीपूर्वी आपली राजकीय ताकद अजमाविण्याची संधी यानिमित्ताने साधून घेतली, त्यासाठी नवीन मंडळाची स्थापना करण्याबरोबरच प्रभागातील सार्वजनिक गणेशोत्सव मंडळांना देणगी स्वरूपात मदतही करण्यात आली होती. गणेशोत्सवातील दहा दिवसांत ठिकठिकाणच्या मंडळांना विविध स्पर्धा भरविण्यास भाग पाडून पारितोषिकांचे वितरणही करण्यात आले. गणेश मंडळांच्या आरत्यांना आवर्जून हजेरी लावणाऱ्या इच्छुकांनी गुरुवारी श्री विसर्जन मिरवणूक मार्गावर स्वागत मंडप उभारून प्रत्येक मंडळाच्या अध्यक्ष व पदाधिकाऱ्यांचे शाल, श्रीफळ देऊन सत्काराचा धडाकाही लावला. (प्रतिनिधी)