भाजपच्या आऊटगोईंगला लवकरच सुरुवात?

महापालिकेच्या पंचवार्षिक निवडणुकीच्या कारकिर्दीत अखेरच्या वर्षात आयाराम-गयारामांचे पक्षबदल सुरू होतात. त्यात नवीन नसले तरी सत्तारूढ पक्षाला त्याचा चांगलाच फटका बसतो. २०१२ मध्ये मनसेचे ४० नगरसेवक निवडून आले होते. शेवटच्या वर्षी म्हणजेच २०१७ मध्ये त्यातील ३० नगरसेवक अशाच प्रकारे माघारी परतल्याने या पक्षाची अवस्था केविलवाणी झाली होती. त्यानंतर केंद्र आणि राज्यातील लाटेमुळे भाजपने २०१७ मध्ये बहुमत मिळवले. या पक्षाचे ६६ नगरसेवक निवडून आले असले तरी या पक्षाचे मूळ कार्यकर्ते अवघे ९ आहेत. बाकी सर्व आयाराम मनसे, शिवसेना, काँग्रेस आणि राष्ट्रवादीकडून निवडून आलेले आहेत. त्यामुळे जोपर्यंत भाजपला अनुकूल वातावरण आहे तोपर्यंत असे आयाराम राहणार आणि वर्षाच्या अखेरीस ते मूळ किंवा ज्या पक्षाची चलती त्या पक्षात जाणार हे उघड आहे.

मध्यंतरी भाजपतून माजी आमदार वसंत गिते आणि सुनील बागुल हे त्यांच्या मूळ पक्षात म्हणजे शिवसेनेत प्रविष्ट झाले. त्याचवेळी त्यांचे समर्थक आता बाहेर पडणार हे स्पष्ट झाले होते. मात्र, त्यावेळी अनेकांनी सबुरीचे धोरण स्वीकारले. वसंत गिते यांचे सुपुत्र प्रथमेश गिते यांना यंदाच्या पहिल्यांदाच निवडून आल्यानंतरही भाजपने उपमहापौरपद दिले होते, तर सुनील बागुल यांच्या मातोश्री भिकूबाई बागुल विद्यमान उपमहापौर आहेत. गिते यांचे आठ ते दहा समर्थक भाजपत असल्याचे सांगितले जाते. तसेच बागुल यांचे काही समर्थक तसेच मूळ शिवसेनेतून आलेलेदेखील स्वगृही परतण्याच्या तयारीत आहेत. शनिवारी (दि.२८) प्रथमेश गिते यांनी संजय राऊत यांची भेट घेतली असली तरी एकाचवेळी भाजपला मोठा दणका देण्याची शिवसेनेची तयारी असल्याचे वृत्त आहे.

इन्फो...

अपक्ष काँग्रेसच्या वाटेवर

अपक्ष नगरसेवक मुशीर सैय्यद हे काँग्रेस पक्षात जाणार असून प्रदेशाध्यक्ष नाना पटोले यांच्या उपस्थितीत त्यांचा प्रवेश सोहळा होणार आहे. आणखी एक- देान अपक्षदेखील काँग्रेस पक्षाच्या वाटेवर असल्याचे सांगण्यात येत आहे.

इन्फो...

मनसेतही इनकमिंग हेाणार

मनसे अध्यक्ष राज ठाकरे यांनी नाशिकमध्ये पुन्हा लक्ष घातल्यानंतर आता मनसेतून गेलेले काही नगरसेवकदेखील परतीच्या मार्गावर असल्याचे सांगण्यात येत आहे. त्यामुळे आयाराम -गयारामांची चर्चा रंगली आहे.