संसारवेलीवर कळी फुलण्याआधीच कोमेजली

दुर्दैवी घटना : नाशिकरोड उड्डाणपुलावर अपघात

नाशिकरोड : संसाराची स्वप्ने रंगवत असताना व महिनाभरानंतर मेहंदीने हात रंगण्यापूर्वीच नाशिकरोडच्या उड्डाणपुलावर झालेल्या अपघातात सुरगाणा येथील लग्न ठरलेली युवती ठार झाली. या घटनेमुळे सुरगाणा भागात हळहळ व्यक्त केली जात आहे.
सुरगाणा येथील रोहिणी मनोहर वाघमारे (२३) या युवतीचा चार-पाच महिन्यांपूर्वीच सिन्नर तालुक्यातील बारगाव पिंप्री येथील प्रकाश ऊर्फ पंकज भगवान गांगवे यांच्याशी विवाह ठरून साखरपुडा झाला होता. महिनाभरानंतर मार्च महिन्यात त्या दोघांचा विवाह करण्याचे दोन्ही कुटुंबीयांकडून ठरले होते. बारगाव पिंप्री येथे राहणाऱ्या रोहिणीची मोठी बहीण वैशालीच्या नणंदचा विवाह असल्याने रोहिणी ज्यांच्यासोबत संसाराची स्वप्ने रंगवत होती त्या प्रकाश गांगवे यांच्यासोबत मोटारसायकल (एमएच १५, एफई ६०७७) वरून बुधवारी दीड वाजेच्या सुमारास नाशिकरोडहून सिन्नरच्या दिशेने उड्डाणपुलावरून जात असताना रेल्वे गेस्टहाउसच्या वरती पाठीमागून गॅस टाक्या वाहतूक करणाऱ्या अज्ञात ट्रकने मोटारसायकलला पाठीमागून जोरदार धडक दिल्याने रोहिणी ही गंभीर जखमी होऊन मयत झाली. तर प्रकाश हा जखमी झाला असून, त्याच्यावर रुग्णालयात उपचार सुरू आहे. याप्रकरणी नाशिकरोड पोलीस ठाण्यात अपघाताचा गुन्हा दाखल करण्यात आला आहे. (प्रतिनिधी)