तारवालानगर परिसरात बस-ट्रकचा भीषण अपघात

दिंडोरी रोडवरील तारवालानगर येथील सिग्नलवर शनिवारी (दि.३१) पहाटे सव्वासहा वाजेच्या सुमारास ट्रक व शहर बसचा भीषण अपघात झाला. सुदैवाने या अपघातात कोणतीही जीवितहानी झाली नाही.

पंचवटी : दिंडोरी रोडवरील तारवालानगर येथील सिग्नलवर शनिवारी (दि.३१) पहाटे सव्वासहा वाजेच्या सुमारास ट्रक व शहर बसचा भीषण अपघात झाला. सुदैवाने या अपघातात कोणतीही जीवितहानी झाली नाही.
तारवालानगर येथील सिग्नलवर बस व ट्रक एकमेकांना धडकल्याने दोन्ही वाहनांचे मोठे नुकसान झाले आहे. तारवालानगर चौकात शनिवारी निमाणीतून दिंडोरीरोडने म्हसरूळकडे जाणारी शहर बस क्रमांक एमएच १५, एके ८०९३ जात होती. पहाटे सहा वाजेच्या सुमाराला शरदचंद्र पवार बाजार समितीकडून भरधाव वेगाने ट्रक क्रमांक एमएच ४५, टी ६६६७ तारवालानगर सिग्नल चौफुलीकडून लिंक रोडने जात असताना बसला जोरदार धडक दिली. बस व ट्रकचे नुकसान झाले. सुदैवाने बसमध्ये प्रवासी नसल्याने कोणतीही जीवितहानी झालेली नसली तरी भविष्यात असा प्रकार घडू नये, यासाठी शहर पोलिसांची वाहतूक शाखा व मनपाने उपाययोजना करण्याची मागणी नागरिकांकडून होत आहे. तारवालानगर चौफुलीवर वारंवार अपघात होत असतानाही महापालिका आणि शहर वाहतूक पोलीस शाखेकडून कोणतीही उपाययोजना केली जात नसल्याने परिसरातील नागरिकांकडून संताप व्यक्त होत असून, अपघातावर नियंत्रण मिळविण्यासाठी महापालिका आणि शहर पोलिसांच्या वाहतूक शाखेने लक्ष केंद्रित करण्याची मागणी नागरिकांनी केली आहे.