पदव्युत्तर वैद्यकीय उन्हाळी परीक्षांच्या वेळापत्रकात बदल

नाशिक : महाराष्ट्र आरोग्य विज्ञान विद्यापीठाच्या उन्हाळी २०२१ पदव्युत्तर वैद्यकीय अभ्यासक्रमाच्या (पीजी मेडिकल ) परीक्षांच्या वेळापत्रकात बदल करण्यात आला असून, या परीक्षा प्रशासकीय कारणांमुळे पुढे ढकलण्यात आल्याची माहिती विद्यापीठाचे परीक्षा नियंत्रक डॉ. अजित पाठक यांनी दिली.

महाराष्ट्र आरोग्य विज्ञान विद्यापीठातर्फे २४ जून २०२१पासून पदव्युत्तर वैद्यकीय अभ्यासक्रमाच्या परीक्षा घेण्याचे नियोजन करण्यात आले होते. परंतु, प्रशासकीय कारणांमुळे आता या परीक्षा पूर्वनियोजित वेळापत्रकानुसार होणार नसल्याचे परीक्षा नियंत्रक डॉ. अजित पाठक यांनी स्पष्ट केले आहे. त्याचप्रमाणे या परीक्षांचे सुधारित वेळापत्रक विद्यापीठाच्या संकेतस्थळावर नंतर अद्ययावत करण्यात येणार असल्याचेही त्यांनी सांगितले. दरम्यान, परीक्षा पुढे ढकलण्यात आल्याचे पत्रक शुक्रवारी (दि. ७) विद्यापीठाच्या संकेतस्थळावर अपलोड करण्यात आले असून, विद्यार्थ्यांनी परीक्षांसदर्भात कोणत्याही अफवांवर विश्वास ठेवू नये, असे आवाहन डॉ. अजित पाठक यांनी केले आहे.