बिबट्याच्या हल्ल्यात बालकाचा मृत्यू

परमोरीतील घटना : ग्रामस्थ भयभीत, पिंजरे लावण्याची मागणी

ठळक मुद्देयापूर्वी बिबट्याच्या हल्ल्यात म्हेळुस्केत श्रीरंग हर्षवर्धन खिरकाडे व लखमापूर येथील विवेक बिंद या बालकांचा मृत्यू झाला होता.

दिंडोरी : तालुक्यातील परमोरी येथे बिबट्याच्या हल्ल्यात तीन वर्षीय बालकाचा मृत्यू झाल्याची दुर्दैवी घटना घडली असून या घटनेने परिसरात भीतीचे वातावरण पसरले आहे. दिंडोरी तालुक्यात गेल्या दोन वर्षातील ही तिसरी घटना आहे.
याबाबत मिळालेली माहिती अशी की, परमोरी शिवारात ज्ञानेश्वर दिघे यांच्या टमाटाच्या शेतात कुटुंबातील महिला सदस्य काम करत होते. शेजारीच लहान मुलेही खेळत होते. सायंकाळी साडे पाच वाजेच्या सुमारास शेजारील उसातून बिबट्याने तेथे खेळत असलेल्या सार्थक ज्ञानेश्वर दिघे (वय ३) याच्यावर हल्ला चढवला आणि त्याच्या मानेचा लचका पकडत त्याला उसाच्या शेतात ओढत नेले. सदर घटना समजताच सार्थकची आई व आजीने आरडाओरडा सुरू केला. त्यामुळे आजूबाजूचे शेतकरी जमा झाले आणि त्यांनी उसात शोध घेतला असता बिबट्याने धूम ठोकली. जखमी सार्थक यास तातडीने दवाखान्यात उपचारास नेण्यात आले परंतु, दिंडोरी ग्रामीण रु ग्णालयातील डॉक्टरांनी त्यास मयत घोषित केले. यावेळी नागरिक मोठ्या संख्येने उपस्थित होते. आमदार नरहरी झरिवाळ यांनी वनविभागाला सूचना देत तातडीने बिबट्याचा बंदोबस्त करण्यासाठी उपाययोजना करण्याच्या सूचना दिल्या. यापूर्वी बिबट्याच्या हल्ल्यात म्हेळुस्केत श्रीरंग हर्षवर्धन खिरकाडे व लखमापूर येथील विवेक बिंद या बालकांचा मृत्यू झाला होता.