ट्रकखाली चिरडून चिमुकला ठार

----

नाशिक : गंगापूररोडवरून आपल्या काकांसोबत दुचाकीवरून प्रवास करत असताना भरधाव जाणाऱ्या एका ट्रकने दुचाकीला धडक दिल्याने झालेल्या अपघातात ट्रकच्या चाकाखाली सापडून सात वर्षीय चिमुकल्याचा जागीच मृत्यू झाल्याची दुर्दैवी घटना घडली. याप्रकरणी सरकारवाडा पोलीस ठाण्यात फरार ट्रकचालकाविरुद्ध गुन्हा दाखल करण्यात आला आहे.

गंगापूर रोडवरील विद्याविकास सर्कल येथून बुधवारी(दि.१४) फिर्यादी प्रवीण गोविंदसिंग घोती (३१, रा. शुभलक्ष्मी कॉलनी, पाथर्डीफाटा) हे त्यांच्या पुतण्या विघ्नेश जीवनसिंग घोती(७) याला सोबत घेऊन दुचाकीने (एम.एच १४ बीपी १९५६) प्रवास करत होते. यावेळी गंगापूर गावाकडून भरधाव आलेल्या ट्रकच्या चालकाने रस्त्याच्या परिस्थितीकडे दुर्लक्ष करत ट्रकने (यू.पी.१८ डिटी ५२५१) धडक दिली. या धडकेत ट्रकच्या मागील चाकाखाली विघ्नेश सापडून जागीच ठार झाला, तसेच दुचाकीचालक प्रवीण हेदेखील जखमी झाले. अपघात होताच ट्रकचालकाने घटनास्थळावरून पलायन केले. यावेळी गंगापूररोड विद्या विकास सर्कल ते जुना गंगापूर नका या रस्त्यावर मोठ्या प्रमाणात वाहतूक कोंडी झाली होती. घटनेची माहिती मिळताच सरकारवाडा पोलिसांनी घटनास्थळी धाव घेतली. मयत विघ्नेशचा मृतदेह तत्काळ शववाहिकेतून जिल्हा शासकीय रुग्णालयात हलविला. अज्ञात ट्रकचालकाविरुद्ध पोलिसांनी चिमुकल्या विघ्नेशच्या मृत्यूला कारणीभूत ठरल्याप्रकरणी गुन्हा दाखल केला आहे. पुढील तपास उप-निरीक्षक बैरागी करीत आहेत.