सिडकोमध्ये ट्रकखाली सापडून कामगार ठार

यावेळी ट्रकच्या मागील चाकाखाली सापडून युवक जागीच ठार झाल्याची घटना संध्याकाळी साडेसहा वाजेच्या सुमारास घडली.

नाशिक : सिडको परिसरातील कामटवाडे येथील डीजीपीनगर क्रमांक २च्या एका पेट्रोलपंपासमोर दुचाकीवरून जाणाऱ्या एका २१ वर्षीय कामगाराला आयशर ट्रकने धडक दिल्याने दुचाकीस्वार जमिनीवर कोसळला. यावेळी ट्रकच्या मागील चाकाखाली सापडून युवक जागीच ठार झाल्याची घटना संध्याकाळी साडेसहा वाजेच्या सुमारास घडली.
याबाबत पोलिसांनी दिलेल्या माहितीनुसार, किरण साहेबराव सुर्यवंशी (२७,रा. खुटवडनगर) हा युवक आपल्या दुचाकीने (एमएच १५ एफई ०६९७) जात असताना आयशर ट्रकचालकाने (एमएच १५ अ‍ेजी १९८) रस्त्याच्या परिस्थीतीकडे दुर्लक्ष करीत भरधावपणे जाण्याचा प्रयत्न करत असताना दुचाकीस्वार सुर्यवंशीयास धडक दिली. यावेळी सुर्यवंशी जमिनीवर कोसळला. दरम्यान, ट्रकच्या मागील चाकाखाली सापडल्याने त्याचा मृत्यू झाला. सिडको परिसरात दोन दिवसांत ही दुसरी घटना आहे. रंगपंचमीच्या दिवशी गतिरोधक ओलांडत असताना एका दुचाकीस्वार महिलेला आयशर ट्रकने धडक दिल्याने तिचाही मागील चाकाखाली सापडून मृत्यू झाला होता. या दोन्ही घटना लागोपाठ घडल्याने सिडको परिसरात हळहळ व्यक्त होत असून बेशिस्त वाहतुकीबाबत तीव्र संताप व्यक्त केला जात आहे. सिडकोतील रस्त्यांच्या दुतर्फा असलेले अतिक्रमण हटवून रस्ते रुंद करण्याची मागणी होत आहे.