वाढता वाढे नाशकात थंडीचा कडाका

गेल्या शुक्रवारपासून शहराच्या वातावरणात बदल होण्यास सुरुवात होऊ लागली. शनिवारी सकाळी अचानकपणे किमान तापमानाचा पारा घसरला आणि नाशिककरांना कडाक्याची थंडी पुन्हा अनुभवयास येऊ लागली. दिवाळीपासून थंडी वातावरणातून गायब झाली होती. यामुळे नाशिककरांनी आपले उबदार कपडे पुन्हा घडी करून ठेवले होते; मात्र मागील चार दिवसांपासून थंडीची तीव्रता दररोज वाढू लागल्याने नागरिक थंडीपासून बचाव करण्यासाठी उबदार कपड्यांंचा वापर करताना दिसून येत आहे.

पहाटे तसेच संध्याकाळी नागरिकांना थंडीची कमालीची तीव्रता जाणवली. रविवारप्रमाणे सोमवारीसुद्धा सकाळी १० वाजेपर्यंत वातावरणात गारठा जाणवत होता.

विदर्भापाठोपाठ उत्तर महाराष्ट्रासह संपूर्ण राज्यभरात बोचऱ्या थंडीने जोरदार पुनरागमन केले आहे. मागील दोन ते तीन दिवसांपासून थंडीची लाट आली आहे. राज्यात सर्वाधिक कमी किमान तापमान परभणी (१०.२) येथे नोंदविले गेले. त्यानंतर सर्वाधिक थंडीचा कडाका असलेले दुसऱ्या क्रमांकाचा जिल्हा म्हणजे नाशिक. नाशकात थंडीचा कहर दिवसेंदिवस वाढत आहे.

गोदाकाठासह शहरातील झोपडपट्ट्यांच्या भागात तसेच गावठाण भागासह शहरालगतच्या खेड्यांमध्ये सायंकाळनंतर शेकोट्याही पेटू लागल्या आहेत. रविवारी राज्यात सर्वाधिक कमी नीचांकी तापमानाची नोंद पुणे येथे १०.७ अंश इतकी करण्यात आली. महाबळेश्वरच्या तुलनेत अन्य शहरे सर्वाधिक थंडीने गारठली आहेत.

=

--इन्फो--

फुलले शहरातील जॉगिंग ट्रॅक

थंडीची तीव्रता पुढील आठवडाभर शहरात कायम राहणार असल्याची शक्यता हवामान खात्याकडून वर्तविली जात आहे. पहाटेच्या सुमारास थंडीचा कडाका अधिक जाणवत असला तरी सकाळी व्यायामप्रेमींच्या उत्साहावर त्याचा कुठलाही परिणाम झालेला सध्या दिसून येत नाही. हौशी व्यायामप्रेमींची संख्या अधिक वाढू लागली आहे. शहरातील मध्यवर्ती भागासह गंगापूररोड, कॉलेजरोड, इंदिरानगर, गोविंदनगर, कृषिनगर, डीजीपीनगर, रविशंकर मार्ग, अशोकामार्ग, उपनगर आदी भागांमधील जॉगिंग ट्रॅकवर सकाळ-संध्याकाळ फेरफटका मारणाऱ्यांच्याही संख्येत वाढ झाल्याचे चित्र पहावयास मिळत आहे-

---इन्फो----

...आला आरोग्यवर्धक हिवाळा

हिवाळा ऋतू आरोग्यवर्धक मानला जात असल्यामुळे बहुतांश तरुण व्यायामप्रेमी बोचऱ्या थंडीकडे दुर्लक्ष करीत ‘वॉर्मअप’द्वारे ऊर्जा निर्माण करत व्यायामावर भर देत आहे. ग्रीन जीमचा वापरही वाढला असून, शरीरासाठी गुणकारी असलेल्या विविध औषधी रसांनाही मागणी मिळत आहे. व्यायाम करताना जॉगिंगट्रॅकवर मिळणाऱ्या विविध पालेभाज्या, फळभाज्यांसह आवळासारख्या औषधी गुणधर्म असलेल्या फळांच्या रसाची विक्री हंगामी विक्रेते करताना दिसत आहे.

---