सिडकोतील दुभाजकांची दुरवस्था

रस्त्यावर मोकाट कुत्र्यांचा उपद्रव

नाशिक : जुने नाशिक, भद्रकाली परिसरात मोकाट कुत्र्यांचा उपद्रव वाढला आहे. कुत्र्यांच्या झुंडी सकाळी आणि रात्रीच्या सुमारास रस्त्यावरून फिरत असल्याने नागरिकांनाही त्यांची भीती वाटत आहे. बाजारात येणाऱ्या नागरिकांना त्यांचा त्रास सहन करावा लागतो. रस्त्त्यावर टाकलेले शिळे अन्न, दुकानांतून फेकले जाणारे पदार्थ यामुळे कुत्र्यांचा संचार वाढल्याने नागरिकांना त्रास सहन करावा लागत आहे.

उद्यानांमधील गवताने डासांचा उपद्रव

नाशिक : शहरातील बंद उद्यानांमध्ये गवत वाढल्यामुळे डासांचा उपद्रव मोठ्या प्रमाणात वाढला आहे. त्यामुळे उद्यानांमधील गवत काढून उद्याने पुन्हा सुशोभित करावीत. तसेच परिसरात धूरफवारणी करून डासांचा उपद्रव कमी करण्याची मागणी परिसरातील नागरिकांकडून करण्यात येत आहे.

मोकाट जनावरांचा रस्त्यावर ठिय्या

नाशिक : शहरातील सातपूर भागात सध्या मोकाट जनावरांचा उपद्रव वाढला आहे. रस्त्यावर मोकाट फिरणाऱ्या गुरांमुळे वाहनचालक त्रस्त झाले आहेत. रस्त्याने फिरणाऱ्या या जनावरांमुळे वाहतुकीला आणि सर्वसामान्य नागरिकांना त्रास सहन करावा लागत आहे. गुरांच्या झुंडी रस्त्यावर ठाण मांडून बसतात. त्यामुळे कधी तर नागरिकांचे अपघातदेखील होतात.

थुंकणाऱ्यांवर व्हावी कठोर कारवाई

नाशिक : कोरोनाचे थैमान सुरूच असल्यामुळे पान, गुटखा खाऊन रस्त्यावर थुंकणाऱ्यांमुळे संसर्ग पसरण्याची भीती असल्याने अशा व्यक्तींविरुद्ध कठोर कारवाई करण्याची गरज आहे. सध्या मास्क न लावल्यास कारवाई होते. मात्र, मास्क बाजूला सारून रस्त्यावर पचापच थुंकणाऱ्या नागरिकांना दंड झाल्याचे दिसत नाही. या प्रकाराला आळा घालण्यासाठी रस्त्यावर थुंकणाऱ्यांविरुद्ध कठोर कारवाई करण्याची नागरिकांची मागणी आहे.

रुग्णांच्या कुटुंबीयांची धावाधाव

नाशिक : अनेक रुग्णांना अद्यापही ऑक्सिजन बेड, रेमडेसिविर उपलब्ध होत नसल्याने नागरिकांची प्रचंड धावाधाव होत आहे. अशा परिस्थितीत संबंधित रुग्णाच्या जवळचे नातेवाईकदेखील मदतीला येऊ शकत नसल्याने कुटुंबातील दोन-तीन बाधित झाल्यास उर्वरित एका व्यक्तीलाच सर्व धावपळ करावी लागत असल्याने नागरिकांची प्रचंड दमछाक होऊन त्यांना मनस्ताप सहन करावा लागत आहे.