कोरोनाने तब्बल २२ तरुणांचा मृत्यू

नाशिक : काेरोनाच्या पहिल्या लाटेत संसर्ग हा प्रामुख्याने घरांतील ज्येष्ठांसह मध्यमवयीन लोकांना अधिक व्हायचा. त्यावेळी बालकांना किंवा तरुणांना संसर्ग झाल्याचे प्रकार अल्प आणि कोरोनाला बळी पडण्याचे प्रमाण अत्यल्प होते. मात्र, दुसऱ्या कोरोना लाटेत लहान मुलांना आणि युवकांना संसर्गाची लक्षणे आढळण्याच्या प्रमाणात मोठीच वाढ झाल्याचे दिसून येत आहे. तसेच बळी जाण्याच्या प्रमाणात १६ ते २५ वयोगटातील युवकांमध्ये मोठी वाढ झाली असून आतापर्यंत जिल्ह्यात २२ तरुणांचा बळी कोरोनाने घेतल्याने कोरोनाबाबत अधिकच काळजी घेण्याची गरज निर्माण झाली आहे.

गतवर्षी डिसेंबरअखेरपर्यंत कोरोनाच्या पहिल्या लाटेत १२ वर्षाखालील लहान मुलांना ताप, घसादुखी, खोकला अशी सौम्य लक्षणे आढळली असली, तरी त्यांच्या रक्तातील ऑक्सिजनची पातळी सामान्य होती. त्यामुळे जिल्ह्यात ६ हजारांहून अधिक बालकांना कोरोना झाला तरी त्यातील बहुतांश बालकांना ॲडमिट करावे लागले नव्हते. त्यामुळे ज्यांच्या घरात पॉझिटिव्ह रुग्ण आढळले आहेत, केवळ त्या घरांमधील बालकांमध्येच प्रामुख्याने आजाराचे प्रमाण अधिक असल्याचे दिसून आले होते. त्यात अत्यल्प आणि अल्प उत्पन्न असणाऱ्यांचा मोठा समावेश होता. त्याशिवाय मुलांमध्ये सौम्य स्वरूपाची लक्षणे आढळण्याचा पॅटर्न दिसून आला होता. अनेक बालकांमध्ये बारीकसा ताप, थोडेसे गरगरणे, खोकला व घसादुखी अशी सौम्य लक्षणे होती. नव्या कोरोना व्हायरस संबंधात जे संशोधन नव्याने पुढे आले त्यात असे आढळले की तरुणांना याची लागण होण्याचे प्रमाण कमी असले तरी याआधीच्या तुलनेत हे प्रमाण अधिक असू शकते. गतवर्षी मोठ्या अर्थात १५ वर्षांपासून पुढील वयोगटातील मुलांमध्ये बाधितांची संख्या १६,६१२ इतकी होती. त्यात गत तीन महिन्यात तब्बल १० हजारांहून अधिक भर पडली असल्याचे दिसून येत आहे.

इन्फो

मुलांचे बाधितचे प्रमाण अधिक

आतापर्यंतच्या बाधित मुला-मुलींमध्ये मुले बाधित असण्याचे प्रमाण मुलींच्या तुलनेत दीडपटीपेक्षा थोडे कमी आहे. ० ते १२ वयोगटात ८८३० बालके बाधित आहेत. त्यात मुलांची संख्या ४९६४ तर ३८६६ बालिकांची संख्या आहे. तर १३ ते २५ वयोगटात वर्षापुढील मुला-मुलींच्या प्रमाणात १५,६३७ इतकी मुले तर १०,९८८ मुली बाधित असल्याचे आढळून आले आहे. त्यामुळे एकूणच बाधितांमध्ये बाहेर खेळण्याचे प्रमाण अधिक असलेल्या मुलांचीच संख्या अधिक असल्याचा निष्कर्ष काढता येतो.

जिल्ह्यात ० ते १२ वयोगटातील बालकांचे मृत्यू

०२

--------

१२ वर्षापुढील मुला-मुलींचे मृत्यू

२२

----------------

कोट

कोरोनाच्या प्रारंभीच्या टप्प्यातील काळात काही बालकांमध्ये गंभीर लक्षणे होती. त्यात एका अवघ्या २ महिन्याच्या बाळाचे तर ८० टक्के फुप्फुसे बाधित झाली होती. मात्र, कोरोनाच्या सर्व उपचारांसह त्याच्यावर प्लाझ्मा थेरपी केल्यानंतरच ते बाळ बरे झाले. तसेच आतादेखील बालकांमध्ये लक्षणे आढळण्याच्या प्रमाणात मोठीच वाढ झाली असल्याचे दिसून येत आहे.

डॉ. सुशील पारख, बालरोग तज्ज्ञ

-----------

कोट

गतवर्षी लहान मुलांमध्ये कोरोनाची अगदी सामान्य लक्षणे होती. मात्र, आता गत तीन महिन्यांपासून जुलाब हे देखील एक लक्षण दिसून येते. तसेच न उतरणारा ताप हेदेखील एक कोरोनाचे लक्षण आढळून आले. मात्र, बालकांमृत्यूचे प्रकार कमी असले तरी बाधित होण्याचे प्रमाण मात्र मोठ्या प्रमाणात वाढल्याचे दिसून येत आहे.

डॉ. सुयश नाईक, बालरोग तज्ज्ञ